市場正觀望美國中期選舉結果，普遍預期只要共和黨重奪參眾兩議院其中一院控制權，便有能力制衡民主黨，有利日後美息回落，對美股利好。港股連升兩日，恒指升逾1200點後，今日回吐，暫時喺16400至16600水平整固。
恒指高開44點，最多升123點，見16719半日高位，但暫未見資金願意高追，其後大市回軟倒跌最多166點，見16429半日低位止跌回升，暫時喺16400至16600之間整固上落。恒指半日收報16588，跌7點；國指半日跌19點，報5616；恒科指半日跌0.75%，收3371。半日成交額喺整固期間回落至616.87億元，反映嚟到呢啲位，沽壓唔算大，不過買盤亦欠積極。
藍籌股個別發展，不過友邦(01299)跟大笨象(00005)半日仍錄得升幅，前者升2.1%，後者升0.1%；港交所(00388)甚為硬淨，半日仍升1%。至於ATMJ，又係阿里(09988)半日表現最削，70元未能企穩，上半場仍要微跌，京東(09618)則保持升幅，美團(03690)半日回吐1.6%。暫時ATMJ可以留意返幾個位，騰訊睇住240，美團140，京東163及阿里睇住65，仲企到呢啲位上面，反彈之旅有條件繼續。
有消息指三星明年手機產量按年跌13%，手機股個別發展，瑞聲(02018)半日跌4.1%，舜宇(02382)則微跌0.1%。比亞迪電子(00285)跟通達(00698)半日齊齊跌逾3%，不過蘋概股高偉電子(01415)跟丘鈦(01478)喺蘋果表示減產300萬部iPhone14後，股價半日仍錄得7.2%及0.5%升幅。
電動車龍頭Tesla近日明顯轉弱，反映有資金撤離電動車股板塊，比亞迪(01211)喺股神再度減持下，無法成功挑戰200元大關，股價半日跌1.6%，且看190元短線支持守唔守得住。其他電動車股如小鵬(09868)跌3.8%；蔚來(09866)重挫9.6%，理想汽車(02015)挫4.8%，蔚來更成為半日最大跌幅恒科指成份股。其他汽車股陪跌，只有吉利(00175)仍保持0.2%升幅。
港股自上月低位14600反彈近2000點後，仍未見太大回吐壓力，只要能一直企穩20天線(15940)，大市仍有條件繼續反彈，而下一個要挑戰嘅位係50天線，大約係17500水平，暫時只要大市仍守16200至16400密集區，好友花嘅心機未有白費，整固過後，儲一儲力，仍有條件繼續向上收拾50天線。
麥狄文
(徐狄怡‧證監會持牌人)
