俄烏戰火持續，本來美國聯儲局有意於3月加息0.5厘，但目前情況，鮑爺已傾向本月議息只加息0.25厘，加息幅度細咗，美股乘機反彈，三大指數向上，道指升596點，港股噚日創近兩年低位後， 今早雖有反彈，但力度認真有限，繼續係跟跌唔跟升，半日僅升百點收市。
恒指高開90點，報22434，升幅一度擴大至199點，見22543半日高位後，升幅大大收窄至僅餘34點，見22378半日低位，其後再見買盤出手，叫有返啲力，可惜半日都只係升109點。恒指升109點，半日報收22453；國指半日跌17點，報7890；恒科指則再創成立後新低，更失守5000大關，盤中曾見4934，半日報4950，跌1.3%，表現疲弱。半日反彈大市成交叫多返少少，不過真係好少，只有650.71億元。
大笨象(00005)半日回升3.5%，友邦(01299)半日亦升2%，加埋創科(00669)業績理想股價升一成，三股合力推高恒指140點，創科更成為半日表現最好藍籌股。濠賭股亦見反彈，金沙(01928)半日升2.3%，銀河(00027)半日亦升近2%。至於發咗盈警嘅申洲(02313)，半日急跌近13%，係表現最差藍籌股。
大宗商品價格上升，布蘭特期油今早一度高見118.2美元，創2008年後高位，石油股繼續向上。其他資源價格亦見上升，當中插咗三日水嘅俄鋁(00486)半日反彈15.3%，鐵江現貨(01029)亦升近一成半。其他金屬資源股普遍造好，而動力煤價格連升四日至一個月高位，煤炭股亦有追捧，整個板塊平均升半成或以上。
雖然油價高企對航空股營運構成壓力，但內地航空公司3月5日起上調燃油附加費，航空股全線向好，連帶機場股亦有資金流入。不過油價高企對呢個板塊實際係利淡，加上疫情反覆，國際航運要回復正常需時，暫時航空股表現仍然反覆。
科網股仍然疲弱，恒科指再創成立後新低，睇嚟阿爺監管一日未結束，呢個板塊都只會有波幅，無升幅，暫時都係少沾手為妙。由於指數權重股當中，唔少都係科技股，重磅科技股一日唔擺脫弱勢，港股都係動彈不得。
麥狄文
(徐狄怡‧證監會持牌人)
