市傳昨晚中證監急召集多家投資銀行綫上開會，安撫投資者並且大派定心丸，隔晚在美股的中概股幾近全面反彈，港股今天就在期結日亦反彈逾800點過外收市。
藍籌非一面倒升
港股會否就中央出口術而就此轉勢，恐怕散戶要留意以下幾點，今天恒指成份股不是全部回升，當中仍有24隻下跌1隻無起跌，而留意到內銀在過去兩三天大跌市當中成為資金避風塘股價是不跌反升，在今天升市中就成為跌市對象，應該屬早前避險資金流出來作換馬之用，今天大市成交金額只2541億元，與之周一及周二兩天大跌市成交金額分別為3606億元及2682億元，今天成交與其跌市最高成交當日還少1100億元，表示資金對後市仍頗有保留，港股現時升市隨時只係塘水滾塘魚。
北水愛股仍越升越沽
另一項要留意就係北水9連淨流走，今天雖然騰訊(00700)、美團(03690)及港交所(00388)均升幅逾半成到一成，一洗近日頹風，惟北水仍繼續錄得淨流出未見配合中央節奏，中資資金尚且，大家認為昨晚與全球主要投行高管開完會的中證監、又氹得掂班紅鬚綠眼嗎？北水資金屬最靠近阿爺身邊收消息，連佢地都唔願聽指揮總有佢地一套原因在內，兼且騰訊、美團及港交所暫缺北水下你估又走得幾遠呢！明天又係假期前夕，政策市短炒免過夜為上，小心隨時一個周未返來大市屬晴還屬陰都未知。
梁健雄
筆者未持有上述股票
電郵:deon_leung_888@yahoo.com.hk
編按:作者梁健雄，香港財務策劃人員總工會副理事長，從事金融業達20年，曾任職多份報章包括英文虎報、南華早報、華爾街日報等後勤製作部工作。《炒股讀心》逢每周四跟讀者分享投資心理。
