港股噚日升逾700點創31個月收市新高，但美股隔晚表現反覆，雖然道指收市跌幅大大收窄，標指跟納指更倒升收市，但今早道指期貨再跌逾百點，拖累港股半日回吐，將噚日嘅漲幅嘔返晒出嚟，恒指半日跌700點。恒指低開266點，報29892點，雖然跌幅曾收窄至193點，見29965點半日高位，不過未能收復三萬點失地，其後跌幅再度擴大，一度挫760點，見29398點半日低位。恒指中午跌724點，報收29434點；國指半日跌260點，報收11700點；恒科指半日跌300點，報收9906點，萬點大關失守。
噚日勁升嘅科網龍頭，今日全線反艇，騰訊(00700)跟美團(03690)齊齊跌逾6%，美團係半日跌幅最大藍籌，不過升得急，回得亦甘，美團今日藍籌之中跑第尾。阿里(09988)一直大落後，雖然噚日都有份升，但升幅仍差騰訊、美團一大截，今日回套1.6%，現水平繼續係收集好機會。至於其競爭對手京東(09618)得到有連登契媽之稱嘅美科技股女股神旗下ARKF增持，半日亦跌2%；小米(01810)半日跌1.6%，不過30元應該守得穩。一線科技股反晒艇，二線科技股跌得更厲害，閒閒地跌5%或以上。唔少缸邊友認為今日跌市跟新股快手啟動IPO有關，因快手招股抽走市場資金，其實阿Man認為股市升跌，理由得一個，就係資金流出與流入，其他原因只係馬後炮解釋，根本係多此一舉。
吼住半新股泡泡瑪特
不過回吐又係買貨好機會，今日阿Man吼住半新股泡泡瑪特(09992)，雖然之前有官媒批評「盲盒」風氣不可長，建議監管部門應進一步規範「盲盒」（Blind Box）經營模式，免得助長青少年賭博心態，消息一度令泡泡瑪特股價由95元高位急挫至75元水平喘定。經過一輪整固後，股價重返80元水平，有機會再以一浪高於一浪姿態，重納升軌。下月恒指服務公司將作季檢，市值已逾千億嘅泡泡瑪特，極大機會被納入恒綜指數，亦係成為「港股通」基本條件。一旦泡泡瑪特被納入港股通，北水可買入此股，預料可成為北水寵兒。泡泡瑪特有其獨特性，加上其強大嘅創意團隊，為公司創立多個成功嘅原生IP。
而泡泡瑪特可望成為以IP 為核心嘅多元衍公司，參考萬代、樂高等海外巨頭成長路徑，其商業模式有望向IP 授權、影視內容制作、主題樂園運營等方向延伸。泡泡瑪特若能構築多維立體嘅平台型IP 孵化及運營公司，其價值將得到顯著躍進。2019年市佔率達8.5%，具有龍頭地位，考慮公司嘅高速成長性及商業延展性，綜合可比公司估值及絕對估值，內地證券具頭廣發證券認為泡泡瑪特合理價值為110.4港元，可作為參考目標價，現價買入，跌穿75元止蝕，有數圍值得博一博。
麥狄文
(徐狄怡‧證監會持牌人)
