上周五係歐美股市嘅黑色星期五，尤其美股三大指數均跌逾2%，主要係美債息急升，令到股市跟債市齊齊暴跌，拖累港股夜期當晚急跌至32000水平，今早新加玻黑期進一步下跌至31600點水平，導致港股大裂口低開。
恒指今早裂口低開886點，最低見31725點，礙於下跌裂口太大，收窄跌幅好正常，加上內地股市回穩，上證指數死守3400點，帶動港股反彈收窄跌幅，中午恒指報收32022點，跌578點；國指則跌224點，報收13314點。
大部份指數重磅股都係大裂口低開之後，隨大市低位回升，跌幅收窄，表面睇落好似好有支持，但阿Man暫時只視為調整中嘅反彈，主要係大市由12月中28200左右起步回升，升至33500點水平，累計升幅5300點，當中一直未出現較大幅度調整。雖然目前由高位計算，至今朝低位約31700，已回調1800點，但仍遺下31100-31400點大型上升裂口未回補，要後市更上一層樓，呢個上升裂口先回補，大市之後可以升得更放心。估計今日大裂口低開之後，反彈有權去番20日線，即32200點左右，除非反彈之後再企穩32200點之上，否則仍有條件向下回補之前嘅上升裂口，甚至更狠心踩落條50日線附近。不過今日裂口低開，31800以上嘅恒指牛證已全部入晒殮房，暫時下一個重貨區要落到31000點附近，斷估呢兩日先營造反彈，再睇牛熊證街貨變化，再決定大戶繼續食牛扒，抑或又轉口味鋸熊掌。
要知大市幾時調整完成，不過留意幾隻指數重磅股，騰訊(00700)、港交所(00388)跟平保(02318)都已失守20日線，尤其騰訊距離20日線453元較為遠距離，當然騰訊一日上落十蚊樓上唔出奇，總之騰訊唔重返20日線企穩，再橫行整固，暫時仍處於調整浪中。至於港交所跟平保，略為失守20日線，同樣地唔收復20日線並靠穩，反彈過後唔排除再調整，買貨唔需要太心急，再觀察一兩日再作決定亦未遲。寧買貴，莫買錯，阿Man寧願買貴，順勢坐住上，亦唔願貪平嗰些少，買咗仲要被折磨，當然喺上月初已買入，喺30000邊水平坐住嘅平貨，要留作貨底，唔可以完全吉咗個倉。
幸而阿Man喺三萬三水平已減持套利，並增加現金等撈貨，暫時唔心急撈底，因為未能確定32000水平係短期低部，寧願等大市回復強勢，與其現水平買入，或可能再捱多一千點跌幅，倒不如待調整完成，同樣喺32000水平買上，順勢買上點都容易打過逆境波。
港股通黑馬
留意明日港交所會喺明日收市後更新「港股通」名單，大熱門股之一嘅閱文集團(00772)今日低開高走，現價已再逼近80元，好大機會獲納入港股通。而阿Man則睇埋另外兩隻黑馬遠大醫藥(00512)以及中海物業(02669)，兩股同樣市值係100億元左右，呢個晒士最啱北水脾胃。但純以今早走勢嚟睇，遠大醫藥最唔似樣，係賠率廿倍以上冷門，反而閱文跟中海物業走勢較為對辨，似有春江鴨為咗兩股加入港股通而偷步入場。
麥狄文
(徐狄怡‧證監會持牌人)
