日圓滙價弱個藥煲，作為日本迷的我當然發光，日本何止四季景色分明，四季食品更各具特色，冬天食士多啤梨，夏天就桃及西瓜，秋天最當令是提子及秋月梨等等。
當然夏天都可以食到日本士多啤梨，但一定唔喺最甜又最好食，若食正勁酸士多啤梨，便標籤全部日本水果就喺難食，簡直喺人生一大憾事，其實只是時機對錯問題。
投資市場亦一樣，大氣候唔就之時，向高難度挑戰企對邊，只喺攞苦嚟辛。例如過往幾年聯儲局瘋狂印錢推高股市，學沽空機構沽空股票賺大錢絶對是大嘥鬼，當然全球成千上萬隻股票實有下跌，但何必要「冒飛虎隊嘅險，去賺洗碗嘅錢」。
隔晚聯儲局班官員又再「神鵰」上身，主席鮑威爾不單大讚有外號「雪茄伏」的聯儲局前主席伏爾克(Paul Volcker)，透過大幅加息擊退通脹，市場揣測鮑威爾將走「雪茄伏」舊路大幅加息。此言一出立即激起千層浪，原先美股早段道指曾飆331點，之後立即嚇散，倒跌436點收工，對息口更敏感的納指，全日更挫2.1%。
故仔都有教「披著羊皮的狼」，現時財金上有一隻「扮巨鷹的鴿」，短期要扭轉聯儲局加息決定當然不可能，正如硬要在夏天食士多啤梨一樣，最終慘過食檸檬，時機唔對就喺唔對，何必搵自己笨。
輝達與Salesforce穿三月底
尤其無盈利、高估值、用市銷率或EV/TAM估值的股份，目前通通已由天上跌入凡間。例如晶片股輝達(Nvidia)，無人唔知佢喺全球GPU一哥，業務又有AI、自動駕駛及數據中心護法，雖然估計今年有28%增長，但目前預期市盈率達35.5倍，高估值下，結果昨晚已率先質穿3月低位(圖一)，道指成份股Salesforce(CRM)亦一樣(圖二)。
别以為美國近期消費股強勢，估值就唔貴，以道指成份股可樂(KO)為例，市場估今明兩年增長卻只有5.7和7.5%，目前預計今年市盈率成27倍，為過去五年最高，在加息收水主導前題下，消費股追跌絶對有可能。
「Don't fight the Fed」喺自2008年海嘯後投資市場金科玉律，意思即喺勿與聯儲局對著幹，而家聯儲局硬要加息對抗通脹令股市跪低，下試3月中低位12555機會好大(圖三)，美股持倉大方向仍是動態清零，更進取就喺沽空股市，但要嚴守升穿50天線止蝕。
編按:作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周三、五在「信報網站」及「港股360」撰文。
