美國上周聯儲局議息維持利率不變，不過會後鮑爺放鴿，暗示加息周期已告一段落，並可以開始討論何時減息，刺激美股上周繼續做好。道指連日創新高，標指跟納指亦逼近歷史高位。展望呢個星期，市場焦點會係美國經濟數據，較為重要係周五嘅美國11月個人消費開支指數(PCE)。市場預期，名義PCE按月沒變動，核心PCE則升0.2%。除咗PCE外，美國本周公布嘅消費者信心指數，上周首次申領失業救濟人數，耐用品訂單，二手房屋銷售指數，新屋銷售等數據，同樣具有參考價值。美股維持強勢，港股上周五跟隨美股反彈，可惜ADR及夜期又回軟，今日港股再度低開，重返16600水平。
恒指低開122點，半日最多跌187點，見16605半日低位，但16600為一小時圖所形成嘅頭肩底頸線所在，暫見支持。其後跌幅收窄至78點，見半日高位16713，可惜未能企穩再度偏軟。半日恒指跌158點，報收16633、國指跌61點，報5639；恒科指跌43點，報3736。半日成交額489.55億元，臨近聖誕節長假期，預料本周交投淡靜。
重磅科網股個別發展，阿里(09988)跟小米(01810)逆市分別升0.3%及0.4%；但其他重磅科網股普遍偏軟，騰訊(00700)、美團(03690)跟擕程(09961)全線跌逾1%，京東(09618)跌0.5%，不過百度(09888)跟網易(09999)則分別跌2.1%及1.9%。至於商湯(00020)創始人兼執行董事湯曉鷗因病去世，其間接持有嘅A類股份將會轉換成B類股份。商湯股價早段一度跌18.2%，至1.03元上市新低；中午收報1.11元，跌12%。本來阿Man就唔睇好商湯，上市後嘅收入按年持續減少，正常一間發展良好嘅企業，係唔應該愈做愈縮。
金融股表現麻麻，平保(02318)跟國壽(02628)分別跌1.9%及0.3%；友邦(01299)半日跌0.2%；港交所(00388)則跌0.1%。銀行股方面，以中行(03988)半日跌1.3%較弱，其他內銀股跌不足0.5%。之前一直跑贏大市嘅大笨象(00005)半日跌1.8%，但仍守穩60元水平，其實表現已好過好多藍籌股。
半島紅海局勢緊張，全球兩大航運物流巨頭馬士基與Hapag-Lloyd表示，將暫停旗下貨船駛經通往紅海曼德海峽，或又拎航運價急升，今日有資金炒作呢個板塊，相關股份全線向上。而上周五已急升嘅東方海外(00316)半日再升3%，係表現最好藍籌股。
美股破頂，美債息及美滙指數回落，對大市氣氛有正面幫助，亦有助資金回流新興市場，無奈中港股市未見受惠，即使上周五大市反彈，港股成交額重上1300億元，亦未見外資影踪，加上聖誕節長假期將至，更難吸引外資入。恒指初步阻力為上周五一度成功突破嘅20日線16871，即16800至16900水平為首個阻力。至於短線支持為小時圖頸線所在16600，若然失守則向下退守10日線(16410點)及5日線(16486點)交匯區，目前5日線上破10日線形成首個黃金交叉，只要16400穩守，大市仍有望於本月餘下時間重上20日線，甚至挑戰50日線，若17200水平進行年結。
麥狄文
(徐狄怡‧證監會持牌人)
