美國經濟數據不僅反映美國經濟唔係差之餘，更要留意通脹於稍後時間會否回升，而7月份FOMC紀錄表示有需要時再加息，10年債息升至4.28%，重返去年10月高位附近，美股先升後回，三大指數下跌。道指跌180點，標指跌33點，逼近4400大支持位，失守下個支持要去到4300。美匯指數回升，人民幣持續走弱，隔晚夜期跟ADR繼續走軟，今早港股亦隨之低開。
恒指低開306點，早段跌幅曾擴大至428點，見17900半日低位，亦創下去年11月29日以來新低，不過內地股市拗腰反彈，以及道指期貨倒升，帶動恒指曾拗腰回升3點，見18332半日高位。中午恒指收報18303，僅跌21點；國指倒升15點，報6288；恒科指倒升44點，收4164。半日成交額略增至619.96億元，若然今日成交額能回升至1200億元，短線跌浪有機會結束，大市可能又見反彈，繼續其反覆上落、區間移動之旅。
今日以金融股表現較差，只有友邦(01299)半日企返70元倒升，平保(02318)、 大笨象(00005)、港交所(00388)跟建行(00939)半日均跌1%或以上。至於ATMJB個別發展，噚日公布業績嘅騰訊(00700)半日倒升1.5%，但京東(09618)就無咁好彩，派完成績表後，半日仍要跌1.3%；同系京東健康(06618)半日更跌4%，中期經調整盈利升咗1倍都未能撐起股價，藍籌之中表現最差。阿里(09988)半日升不足1%，美團(03690)無起跌，百度(09888)微跌。
至於李寧(02331)，半日升近半成，係藍籌之中表現最好，今日除咗李寧，啤酒股表現亦唔錯，華潤啤酒(00291)、百威亞太(01876)跟青啤(00168)，全部升逾2%，似乎今日消費股啲買盤入場。
至於內房股，其實都唔使嘥口水再講，人仔疲弱，內房反彈好難持續，今日又再向下，整個板塊跌幅由超過1%至近半成，內房物管股等同入咗ICU一直出唔到嚟嘅病人，暫時係生死一線之間徘徊。阿爺再無辧法搞返掂，拆得到內房債務炸彈，內房跟物管股都係半死不活。
大市今日嘅關鍵係18000點，失守嘅話進一步下試17700至17800尋找支持；相反，若能守住18000並反彈至18300水平企穩，跌勢喘定，有機會完成呢一輪跌浪，但能否扭轉弱勢展開反彈浪，18300水平企穩之餘，還要成交重返1200億左右先叫配合，否則無資金入場，港股都係死貓彈。
麥狄文
(徐狄怡‧證監會持牌人)
