隔晚美國聯儲局一如預期加息0.25厘，美股一度向上，但鮑爺講到明今年內唔會減息，美股有啲腳軟，道指升82點，但標指跟納指則微微倒跌。議息會議後的聲明同預期差不多，預咗鮑爺今年唔會減息，但有份議息的委員大部份贊成明年開始減息。值得留意係隨着下半年歐美對資源需求回升，或推升資源價格向上，近日銅價已有少少起動，小心今年餘下時間CPI或有機會反彈，而鮑爺亦有強調，目前通脹仍較目標2%有啲距離。
雖然隔晚美股表現呆滯，但中概股卻有利好消息，小鵬(09868)獲大眾汽車以每股ADR作價15美元入股5%，涉資7億美元，雙方未來會合作出產兩款大眾品牌電動車，並於2026年在中國出售。消息一出，小鵬股價於美市一度急升超過40%，最後升26%收市，亦帶動反映中概股表現嘅金龍指數再升逾2%。
恒指今早高開136點，升幅曾略為收窄至117點，見19482半日低位，其後喺人民幣走強下，港股再度向上，最多升320點，見19685半日高位，並成功突破100天線(19579)。半日恒指收報19629，升263點；國指升129點，報6678、恒科指則升125點，升近3%跑贏大市，收4344。半日成交額649.8億元，大市回升成交亦回升係好事，但暫時未見更多新資金流入。
藍籌股普遍造好，金融股全線向上，友邦(01299)半日升1.2%，大笨象(00005)亦升0.5%，港交所(00388)已企穩300元大關，半日再升1.5%。內銀及內險股亦造好，平保(02318)回升2.8%。至於科技股，今日都有唔錯表現，ATMJB全部錄得接近或超過1%升幅。至於表現最差嘅藍籌係潤電(00836)，半日跌2.4%。
人民幣回升，內房跟物管股回勇，碧服(06098)跟碧桂園(02007)半日升逾一成，後者升13.2%為表現最好藍籌股。其他內房股錄得至少3%以上升幅，合景泰富(01813)更升兩成，似乎係之前情況愈差嘅內房股，反彈力度愈大，跟鐘擺效應有關。
小鵬獲美資入股消息帶動其股價半日升逾三成，蔚來(09866)亦升逾一成，理想汽車(02015)則升4.2%。反而至重磅嘅比亞迪(01211)半日升不足1%，其他汽車股半日普遍升超過半成。內地兩部門發出通知，提出到2025年形成自動駕駛通用功能的智能網聯汽車標準體系，汽車零部件股向上，當中以力勁(00558)升8.8%表現最強，耐世特(01316)跟浙江世寶(01057)雙雙升逾7%緊隨其後，其他零部件股升1.5%至超過2%不等。
內地自政治局會議宣布繼續支持經濟發展後，市場焦點仍放喺內地經濟前景，以及會議後有否具體政策推出。目前港股氣氛較為正面，但短線超買或要整固，只要調整能守住周二上升裂口頂部，約19100點水平，亦即最低一條移動平均線20天線之上。短線阻力為日線保力加通道頂部，約19726，如能企穩100天線並成功突破此通道頂，後市有望再向上挑戰6月份高位20100水平。
麥狄文
(徐狄怡‧證監會持牌人)
