美國聖誕節假後又緊接除夕新年，唔少基金經理仍然休假中，美股成交薄弱，喺缺乏成交支持下，隔晚走軟，三大指數跌逾1%，而反映中概股表現嘅金龍指數更跌逾3%。港股噚日升逾300點，一度重返二萬關，但未能企穩，今早回吐逾200點。
恒指低開250點，跌幅曾收窄至134點，見19764半日高位後沽壓再現，最多跌359點，見19539半日低位。中午恒指收報19675，跌223點；國指跌105點，報6667；恒科指跑輸大市跌108點，收4103。半日成交回復淡靜，只有512億元，噚日都講過，過兩日又到新年長周末，缸邊友買貨又點會積極。
藍籌股可以話由騰訊(00700)撐起半邊天，騰訊跟任天堂一同開發的《寶可夢大集結》獲批12月遊戲版號，股價曾升3%報336元，創逾五個月高位，半日升2.4%，報334元，更以62億元成交額居榜首。不過成交額僅在騰訊之後嘅阿里巴巴(09988)半日跌2.7%，其他重磅股如友邦(01299)、平保(02318)等，半日跌逾2%。但弱咗一段時間嘅藥明生物(02269)半日升3.9%，連帶其他藥股都有唔錯表現，幾隻藍籌藥股全線向上，翰森(03692)升2.4%，中生製藥(01177)升0.7%，石藥(01093)升0.6%。其他醫藥股普遍升2%至超過一成不等。
內房股跟物管股繼續受壓，碧服(06098)插5.4%，為表現最差藍籌；其他藍籌內房股，全線跌2%以上，碧桂園(02007)半日跌3.8%。即使有報告睇好潤地(01109)，指其買入項目具一定折讓，叫做執到平貨，但股價半日仍跌近3%。另一個噚日已見腳軟嘅板塊教育股，今日繼續捱沽，卓越教育(03978)插11.7%，思考樂(01769)挫8.2%，中教(00839)跌2.8%，新高教(02001)挫3%。
暫時港股未能成功企穩二萬大關，此關得而復失，睇嚟都需要時間整固，最棘手係美股走勢每況愈下，標指失守3900重要支持後未能短期內修復失地，美股危危乎，而中港股市炒通關消息，亦已消化得七七八八，嚟到現水平，乜嘢通關利好消息都已反映，港股可能要喺19000至20000水平之間整固，留意10天線及20天線已上移，暫時19300至19500會係一個較重要支持區，一旦此關失守並再下破萬九大關，有機會進一步向下測試100天線18200水平，呢個將會係好友最後一道防線。
麥狄文
(徐狄怡‧證監會持牌人)
