市場仍然消化緊鮑爺放鷹嘅言論，以及要接受聯儲局加快收水嘅步伐，但美國去年第四季經濟表現強勁，就業數據又好過預期，難免令市場擔心3月聯儲局議息，就一嘢加0.5厘息，令本來早段反彈嘅美股，最終倒跌收場，而高估值股份繼續受壓，納指又再跑輸，隔晚跌逾1%。恒指高開11點，雖然曾微升41點，但其後掉頭向下，半日最多跌299點，見23507點半日低位，更創三星期低位。恒指半日報收23606，跌200點；國指半日報收8289，跌69點；恒科指又創成立後新低5228，半日報收5360，跌108點。不過喺北水缺席下，半日成交額702億，似乎沽壓都唔細。
藍籌股表現迴異，港交所(00388)畀大行降評級及目標價，股價半日跌4.2%，藥明生物(02269)半日跌3.8%，跌勢持續。友邦(01299)半日跌3.2%，招行(03968)半日跌2.5%。不過喺加息步伐加快下，大笨象(00005)半日升1.5%；金沙(01928)半日升2.8%，藍籌股之中表現最好。科網股個別發展，阿里巴巴(09988)半日升1.1%，暫時仍穩守紅底股身份；不過TMXJ就全線下跌，小米(01810)再跌逾2%，更創下一年低位；騰訊(00700)、美團(03690)跟京東(09618)半日齊齊下跌。
隔晚Tesla公布業績，雖然盈利破頂，毛利表現亦好過預期，但由於供應鏈問題，已證實今年唔會有新車款面世，隔晚股價跌逾一成，拖累港股嘅汽車股全線受壓。比亞迪(01211)半日跌7.4%，藍籌之中表現最差，其他汽車股亦沽壓重重，其中小鵬(09868)跟理想(02015)分別已連跌9個及6個交易日。除咗汽車股普遍跌1.3%至3.7%之外，汽車零件股亦受壓，耐世特(01316)跟五菱(00305)半日跌逾3%，敏實(00425)半日跌1.4%，已算跌得少。
教育股板塊連日下跌後，瑞信有報告指教育股估值已跌至新低，相信監管走向明朗化，投資者可以回復信心，相關股份急彈，當中呢兩日急跌嘅中教控股(00839)，半日升近三成，其他教育股閒閒地升7%至超過一成不等。
都係嗰句，年近歲晚，提早收爐，今日期指似乎壓住低位結算，下半場個市都未必有乜起色，雖然唔少股份已跌至頗為吸引嘅水平，但礙於長假即至，暫時都係咪手多，待農曆長假過後再作定奪。
P.S. 由於下周一只有半日市，《盤房來料》將暫停一日，初四回歸，跟大家虎年再戰
麥狄文
(徐狄怡‧證監會持牌人)
