話說噚日收咗工之後又走咗去捐血，夜晚碌FB時見到紅十字會出咗個post話今日至5月唔知幾號去捐血嘅會送一個牛仔布保溫袋；本身定期捐血呢個玩意我都持續咗好多年，佢有無嘢送都好，一夠期我就會蒲頭，只不過硬係覺得好似蝕咗咁(死港女性格~)。如果你都同我都一樣唔怕嗰一下針拮的話，不妨去捐個血，隻手最多都係痺一日架咋，對比長期病患日日要輸血嘅病人，真係唔算得係啲乜。
依家9點29分，恒指做完U盤報咗個開市價出嚟，升120點，報24401點，換言之熊證第一層街貨24300至24399點未正式開市就已經全數被收回，呢度有相當於416張期指。至於24400至24499點呢度，咁啱都有相當於416張期指。
至於牛證街貨方面，最貼價街貨推高至24000至24099點，呢度有相當於42張期指，量就真係唔算多，但呢個貼價層一下子將牛熊證街中間位推至大約24250點，牛熊兩者距離太近，恒指好容易喺中間位彈出彈入。
噚日朝早諗住可以手痕搵位入隻恒指牛(61232)跟恒指升一轉，誰不知喺[下半part]出之前，恒指5分鐘圖都未見有超賣位置。睇返5分鐘圖，即使噚日下晝2點35分至2點55分時，SlowSTC(14,3)落到2X呢個位，但都唔係平時day trade入市個位置。
依家9點54分，恒指由升轉跌，講緊都係跌51點，做緊24228點，呢個位即係跌返落去上文計出嚟嘅牛熊證街中間價水平；再加上有啲似挑戰條10天線，呢啲位出手，又有啲似搵命博。
至於隻恒指界(47982)證價都係同噚日一樣無變，Well，或者我都係準備下個星期一正式返公司返工嘅嘢先。
最後，多謝噚日到今日每一位同我講生日快樂嘅朋友同屋企人，有你哋每一日都圍住我，我好難唔快樂架。
作者阿珊，任財經/投資版傳媒人十幾年，《鐘擺戰略贏港股》作者。用技術分析專心玩輪證，唔貪心，志在搵餐下午茶。
電郵：[email protected]；FB：輪證贏家
