上周五美股表現反覆，早段因為銀行股業績優於預期高開，但高位無以為繼，加上零售數據差過預期，再掀起市場對經濟衰退嘅憂慮，美股高開低走，反映中概股嘅金龍指數低收近1%，上周五港股喺ADR跌逾百點，今早港股亦低開。
恒指低開64點，一度跌139點，見20299半日低位，似乎20300水平有支持，其後掉頭回升，半日最多升121點，見20560半日高位。中午恒指報收20548，升110點；10日(20385)及50日線(20348)失而復得。國指升31點，報收6945；恒科指半日升22點，報收4186。半日成交額只有605.93億元，成交繼續呆滯，任你升升跌跌，缸邊友都係唔肯出手。港股今日能夠扭轉跌勢回升，全靠內地股市做好，上證指數近日升1%，升至近日高位。
今日較為特別係盈富基金(02800)半日成交額達73.84億元，佔總成交一成有多，仲係半日最大成交額股份。至於ATMJ則個別發展，除咗京東(09618)逆市跌0.4%，騰訊(00700)、美團(03690)跟阿里(09988)分別升0.1%、0.9%跟0.05%，阿里幾乎持平。上周阿Man推介過嘅中芯(00981)，半日升2.9%；聯想(00992)則升4.3%，後者更成為半日表現最好藍籌股。至於安踏(02020)則逆市跌3.5%，成為表現最差藍籌股。
油價上周回升，帶動商品資源價格走高，三桶油創52周新高，中石油(00857)半日升3.9%、中石化(00386)升1.6%；中海油(00883)亦升1.2%。其他資源股升幅更強勁，上周五急升26%嘅五礦資源(01208)半日再升近一成；中鋁(02600)跟江銅(00358)齊創52周高，分別升6.1%及1.5%。
內地股市向好，更突破前高位，上證指數創九個月新高，帶動內地券商股做好，整個板塊充滿活力，申萬宏源(06806)升7.4%；華泰證券(06886)升3.2%；光大證券(06178)、中國銀河(06881)跟招商證券(06099)齊齊升3%或以上。
上海明日舉行車展，汽車股做好，上周都講過，市場已消化股神一直減持比亞迪(01211)，股價半日上升，短線220元有不俗支持。其他汽車股以小鵬(09868)表現較好，半日升8.4%；其他汽車股普遍錄得3%以上升幅。
今日大市能夠扭轉跌勢，主要係有消息指MPF上限將提高，呢個亦係今日盈富基金成交急升原因。不過暫時未見市場有新資金流入，成交持續低迷，實在難以支持大市進一步攀升。不過重磅股雖然有外資減持，但公司卻積極回購，令股價亦未見有太大回吐壓力，暫時大市守住多條移動平均線之上，係向好訊號，即使成交未見增加配合，暫時港股都係先跟A股做好，就算唔高追，都唔好對著幹做淡。
麥狄文
(徐狄怡‧證監會持牌人)
