俄烏戰火持續，油價狂飊，隔晚美股受壓，三大指數下跌，亞洲股市今日同樣承壓，港股半日走弱，恒指一度挫近300點，半日險守22500。
恒指低開193點，之後跌幅一度收縮至49點，見22712；但在俄烏局勢下，投資者實在無法心安，尤其有烏克蘭軍隊表示，俄羅斯空降部隊在烏克蘭第二大城市哈爾科夫降落，並繼續向首都基輔推進，恒指跌幅又再度擴大至295點，見22466半日低位。中午恒指收報22518，跌243點；國指跌69點，報7983，失守8000大關；恒科指半日報5077，跌78點。大市半日成交額仍然不足600億元，買賣兩閒，缸邊友無心戀戰。
藍籌股整體受壓，大笨象(00005)半日跌4.5%，失守多條平均線後，正向50元進發，幾乎又重返1月初升浪嘅起點。友邦(01299)亦唔好得去邊，半日跌1.2%，目前正險守80元大關。舜宇(02382)被大行調低目標價，加上錄得北水淨流出，股價半日急跌6.3%；瑞聲(02018)亦跌4.7%。業績前股價已走樣嘅創科(00669)，今日業績公布前半日再跌2.7%。雖然信義玻璃(00868)交出一份表現唔錯嘅業績，奈何仍要被瑞信下調目標價，股價半日跌8%；信義光能(00968)半日亦跌7.1%，信義孖寶成為表現最差兩隻藍籌股。
資源股受到油價飊升帶動，昨晚創7年高位，鋁價亦創新高，資源股逆市造好，中海油(00883)跟中石油(00857)分別升4.1%及3.1%，為最大升幅藍籌股。中石化(00386)由於上游業務較少，半日股價只升0.8%。內地動力煤價連升三日，煤礦股造好，其他資源股亦走強。
內房股跟物管股表現疲弱，財政狀況較差嘅跌幅大啲，但財政狀況較穩健嘅亦難逃一跌，半日整個板塊下跌，跌幅由2%至近一成不等。物管股普遍跌半成，總之呢兩個板塊暫時都係無運行。
喺俄烏局勢仍未明朗下，港股動彈不得，睇嚟呢個星期指數未必能重返23000水平，23500之前嘅頸線位就更加唔好講喇，暫時都係一動不如一靜，石油股又怕戰事發展左右油價，資源股高追通常無乜好下場，暫時都係靜觀其變，待市況穩定落嚟再作定奪。
麥狄文
(徐狄怡‧證監會持牌人)
