美股隔晚腳軟，今早亞太區股市亦普遍下跌，港股承接昨日回吐之勢，今日回吐壓力加深，考驗50天線(25194)，一度跌逾400點，但50天線有不俗支持。恒指低開280點報25369，早段跌幅曾收窄至235點，見25414半日高位。隨後沽壓增強，跌幅擴大至427點，見25222半日低位，仍守50天線。恒指半日收報25305點，跌345點；國指中午報收9032，跌160點；恒科指跌200點，報收6471。
藍籌股之中，比亞迪(01211)一枝獨秀，半日升1.7%，已經係表現最好藍籌股，其他藍籌股普遍腳軟，大笨象(00005)則靠穩。科網股除咗派完成績表嘅網易(09999)逆市上升，其他全線走低。內地媒體報道，上海出台法規嚴禁互聯網平台利用算法「殺熟」(即舊客收費較新客貴)，中概科網股沽壓尤其沉重。同樣派咗成績表嘅嗶喱嗶喱(09626)，上季虧損擴大，股價半日跌一成。又係業績麻麻嘅百度(09888)，半日跌近8%。
至於今日派成績表嘅阿里巴巴(09988)，持續弱勢，半日跌近半成，早兩日先話佢160元有不俗支持，今日失守，真係唔讚得，藍籌之中今日佢表現最差。同系阿里健康(00241)半日跌4.7%，業績就到下星期三先公布。至於其他重磅科網股，都係瓜多過菜，京東(09618)跟騰訊(00700)半日分別跌3.3%及2.8%，美團(03690)亦跌逾2%，小米(01810)跌2.8%。
早兩日融創(01918)低價配售融創服務(01516)抽水，阿Man話咗內房企業普遍缺水，估計呢段時間，內房企業抽水活動陸續有嚟。話口未完，今日到碧桂園服務(06098)配股集資，而雅居樂(03383)發24.2億雅生活(03319)換股債，物管股爭住抽水，整個板塊沽壓頗大，跌幅由超過2%至一成不等。
通脹壓力下金價向好，創6月11日後高位，金礦股逆市造好，不過阿Man真係怕被金屬所傷，資源股走勢難捉摸，今日興奮完，分分鐘一日又無影，都係食花生做觀眾算數。反而今日阿Man關注緊一堆生化藥股，早兩日落鑊有炒作，今日見回吐，或者係上車好機會，腫瘤藥領先股康方生物(09926)，以及正有醫療covid-19病毒藥物做緊中期測試嘅君實生物(01877)，又或者有機會被納入「港股通」嘅康諾亞-B(02162)，都係短期有利好股價催化劑之選。
麥狄文
(徐狄怡‧證監會持牌人)
