隔晚美股假後復市，三大指數個別發展，道指受壓跌逾200點，標指跌8點，終止連續七日升勢；納指則再創收市新高。至於港股六連跌後未止瀉，今日更創近三個半月低位。恒指低開295點後，一度跌369點，見27703點半日低位，亦係3月25日以嚟新低。幸而A股回升，港股喘定，跌幅曾收窄至144點，見27928點半日高位，可惜未能重返二萬八心理關口之上，暫時支持變成阻力。恒指中午報收27865點，跌207點；國指報10126點，跌142點；恒科指半日跌76點，報收7570點。
藍籌股個別發展，油組對產量增減猶豫不決，油價走勢唔明朗，石油股腳軟，中石油(00857)跟中海油(00883)分別跌3.4%及2.4%。內地監管多個行業，但內銀股料不在此列，因為國有銀行一直跟足阿爺指引辦事，要放水時配合，要讓利又乖乖就範，估計內銀股係今次監管風暴中，唯一較為安全嘅板塊，但正因為太過乖巧，前景唔夠吸引，安全得嚟只係呆滯，建行(00939)除淨，半日跌近1%，股東未能財息兼收。
滴滴出行上市無耐就畀阿爺將軍，旗下叫車APP被勒令下架，有消息指係滴滴先斬後奏，唔聽阿爺勸告，自把自為係要赴美上市。阿爺對於此等不合作行為，當然嚴懲唔手軟，以後中概股定必要循規蹈矩，稍有唔聽話即被小懲大戒，而阿爺今次對付滴滴亦同時釋出一個訊號，就係唔想中概股赴美上市，要上市集資，最好留喺A股，又或者港股市場，咁港交所(00388)自然成為內地監管風暴中嘅受惠者。
科網平台股仍然受壓，阿Man話咗喺監管風暴下，ATM都無運行，今日騰訊(00700)、阿里(09988)跟美團(03690)，全部跌1%以上；京東(09618)跌2.3%，一早講咗快手(01024)跌穿250元唔掂檔，穿埋200元則落地獄，果然再創上市新低，半日跌2%。反而尋日同受政策困擾嘅生化醫藥股，龍頭藥明生物(02269)半日反彈半成，其他則個別發展。而無辜受累嘅海吉亞醫療(06078)，話咗唔係做藥，可以博反彈，今日反彈逾半成，擺明尋日殺錯良民。
麥狄文
(徐狄怡‧證監會持牌人)
