美股隔晚個別發展，道指跟標指創新高後回落，道指仍升53點，標指則倒跌收場，納指更跌1%，科技股沽壓再現。港股又玩單跳，日升日跌，噚日升逾四百點後，今日略為低開再插水，盤中一度跌逾三百點，失守10日及20日線。
恒指低開28點報28872點，雖然曾收窄跌幅上過28884點半日高位，但科技股沽壓重重，拖累恒指跌幅擴大，10日及20日線又告失守，最多跌369點，見28530點半日低位，至中午收市前跌幅略為收窄。最終恒指報收28623點，跌276點；國指收10831點，跌168點；恒科指則跌160點，跌幅近2%，報收8065點，8000大關岌岌可危。
重磅藍籌股大部份唔精神，社保基金上周再沽中行(03988)，半日跌0.3%，未被沽售嘅建行(00939)反而跌1.2%，工行(01398)半日更跌1.6%。銀娛(00027)半日跌3.3%，為表現最差藍籌，希望守得住65元水平，否則跌勢可能加劇。長實(01113)擴大回購規模，股價半日升2.3%，藍籌之一跑第一。不過回購都唔一定係靈丹妙藥，小米(01810)自上月底公布業績後持續回購，但股價都係咁上下，短線支持位喺24元，喺科技股整體疲弱下，守得住都算係咁。
內地市場監管總局發布，，互聯網平台企業向社會公開《依法合規經營承諾》(第二批)，當中包括騰訊(00700)、快手(01024)、嗶哩嗶哩(09626)、國美(00493)旗下國美在線等，平台股整體受壓。騰訊重組平台與內容事業群(PCG)，半日跌1.7%；雖然有消息指快手主要競爭對手字節跳動啟動來港上市，但快手未如過往般炒影子股炒起，反而半日急跌8.1%，連插四個交易日。留意快手已穿上次低位，破底後低處或未算低，有可能繼續向下尋底。其他科技股普遍受壓，唔少股份都已逼近前低位，暫時唔急撈貨。阿爺持續針對科企，喺政策風險，加上無新北水支持下，科技股有排捱。
美國10年債息回落，而鮑爺多次放鴿，明確表示2022年底前都唔會加息，本地銀行股亦見沽壓，大笨象(00005)跌1.3%，噚日都講過大笨象已難復當年勇，即使宣布恢復派息，股價仍未能重返50元水平之上，長線股東都要面對現實。其他本地銀行股跌幅由0.4%至1.2%不等，總之銀行股就唔係阿Man杯茶，要配置舊經濟股都唔會選擇呢個板塊。
喺市場憧憬經濟復甦重回正軌下，周期股中嘅鋼鐵股或者係其中一個選擇，尤其內地基建、汽車及其他製造業等帶動需求，而環保政策則導致產能下降，令鋼鐵業進入上升周期，行業今明兩年表現應該唔錯。馬鋼(00323)會係阿Man心水，呢啲價買穿3元止蝕，上望目標3.8，又係有數圍先有得博。
麥狄文
(徐狄怡‧證監會持牌人)
