隔晚美股個別發展，納指再創新高，港股隔晚ADR夜期做好，今日再承接A股喺鼠年最後一個交易日做好，港股重返三萬水平。內地上月新增人民幣貸款創新高，加上PPI一年來首次錄按年升幅，A股鼠年收爐前亦最好。
恒指高開320點，開市後升幅曾收窄至256點，見29732點半日低位，其後隨日A股做好，升幅再擴大，曾升570點，見30047點，創1月25日以新高。不過三萬點未能企穩，中午恒指收報29988點，升512點； 國企指數報11807點，升204點；。恒科指重返一萬關，半日升2.5%，報10206點。
港交所(00388)新任CEO終有人選，由美資大行摩根大通的現任私人銀行國際市場首席執行官歐冠昇接掌，成為史上首位外籍舵手。喺中美關係仍未重回正軌，本港政局動盪，外資憂慮國際金融中心地位受損嘅情況下，呢個洋人接班人，有助強調港交所「國際化」招牌未變，藉此安撫人心，希望留住外資。呢一個新CEO似乎市場相當受落，刺激港交所股價半日亦3%，而今日港股整體喺無咗北水支持下，亦錄得如此理想表現，港交所呢枝強心針打得啱晒時候。
其他藍籌股以科技龍頭表現最突出，美團(03690)和騰訊(00700)創新高，半日分別升5.6%和3.4%；就連一直落後，表現呆滯嘅阿里(09988)，半日亦升2.5%，重返260元水平。小米(01810)半日升1.8%，過去幾日小米(01810)喺北水減貨下股價死死吓，今日無咗北水沽貨，股價終有喘息機會，半日升1.8%，希望過完年返嚟，北水唔再沽米而係買米，小米生生性性上返30水平。其他二三線科網股續有資金追捧，網易(09999)遊戲獲得版號，股價半日升近5%，創上市後新高。新丁快手(01024)得到大行加持，中資外資不約而同按其市銷率計給予目標價400元或以上，快手上市後只係抖咗一日，今早曾高見391元再創高位，半日亦升8.4%。快手有貨當然可以坐定定，但無貨喺呢啲位追似乎遲咗步，距離大行目標價400元只差一步，連一成回報都冇，計落條數值博率大減。
港股僅餘明日半個交易日，雖然少咗北水助力，但港交所第一把交椅人選振奮人心，睇嚟今個鼠年有個好結尾收爐，阿Man作為一個大好友，對今年港股前景充滿信心，三萬水平或者只係一個新嘅起步位，有信心年內港股再創歷市新高，北水持續湧入嘅同時，又能得住甚至吸引更多外資(西水)，西北水匯聚下，港股牛年定必牛氣沖天。
P.S. 明日半日市，本欄提早收爐，初五啟市，祝各讀者新年進步，股運亨通
麥狄文
(徐狄怡‧證監會持牌人)
