美股隔晚回吐，納指跌逾1%較為顯著，不過美股連番破頂，回吐係正常，亦係意料中事，不過連美股大好友都警告美股升得過急，樂觀情緒去到一個非理性亢奮嘅階段，要提防美股忽然急挫，大膽追貨冇問題，小心應對先係應有嘅態度。
恒指低開13點報27894，早段最多跌126點，見27781點半日低位，但A股反彈，港股止跌回升，一度升208點，見28117點半日高位，企穩二萬八半日收市。恒指半日收報28037，升129點；國企指數升59點，報11119；恒科指升48點，收8713點。
藍籌重磅股表現唔錯，友邦(01299)終破百成紅底股，呢隻係阿Man少數睇好嘅傳統股，家陣破頂唔估頂，有貨喺手當然坐定定。至於小米(01810)半日亦升4.6%，話咗啲外資報告係靠嚇，人哋股價三十樓上竟然畀個廿幾蚊嘅目標價，真係唔知就嚇死，知道畀佢笑死。再一次證明港股依家係由中資做話事人，北水主導，過往外資當港股係提款機嘅日子不再。外資唔信嘅概念，又或者唔了解國情，未能掌握合理估值，自欺欺人畀個跟現價低幾成嘅目標價，只有繼續落後於人。雖然阿Man唔睇好中資電訊股，但北水嘅威力確不容忽視，喺北水連日力托下，中移動今日再反彈，亦係今日升幅最大藍籌，不過此股盈利前景一般，業務發展亦難有驚喜，反彈還反彈，阿Man無意追貨，頂多都係食花生。
生物科技股今日有資金追捧，百濟神州(06160)與諾華達成合作與授權協議，中午勁升13.4%；唔少其他生物科技股同樣做好，閒閒地升半成或以上。其實呢啲都係資金輪動所致，呢兩日之前熱炒嘅汽車股跟新能源股抖氣，資金就順勢流入生科股，道理就係咁簡單。如果要選擇高追生物科技股，阿Man寧願趁汽車股跟新能源股回調，低吸相關股份，好似今日風電股有沽壓腳軟，阿Man會選擇價廉物美嘅龍源電力(00916)，作為龍頭第電股，PB只有1倍低於同業，又有注資概念，呢啲位值博率高，買入穿十蚊雞打靶，上面梗係博佢再創新高。
麥狄文
(徐狄怡‧證監會持牌人)
