港股2021年先低後高，首個交易日收紅盤，美股隔晚走勢相反，開完紅盤破頂後插水，道指更一度跌逾七百點，失守三萬大關。幸而尾市跌幅收窄，但美股三大指數仍要跌逾1%，拖累港股今早都要插水。
恒指低開191點，一度跌322點見27150點半日低位。其後紐交所表示唔再計劃將三大內地電訊商除牌，港股低位反彈，港股逐步收復失地，見27473點半日高位，可惜A股上證能維持升勢，港股又跟住回落。半日恒指報收27388，跌83點；國指僅跌10點，半日報收10712點；恒科指跌63點，報收8426點。
藍籌個別發展，友邦(01299)、平保(02318)、大笨象(00005)跟工行(01398)全部都跌，友邦創完新高回頭，但都唔係回得多，希望有機會回到10日線可以搵個位上車。阿Man想搵個位上友邦駕車，主要係睇好今年內地開放金融市場，友邦將會受惠。其實舊年阿Man雖然無乜推介傳統股，但友邦係少數阿Man認為進可攻，退可守嘅傳統金融股，唯一風險係怕佢有機會捲入中美角力之中，成為雙方爭拗嘅風眼股。至於阿Man長期愛股港交所(00388)半日逆市創新高升2.2%，花旗將目標價調高至500元，即係較創新高後現價仲有超過一成上升空間，有貨嘅當然坐定定，港交所咁升法，睇怕會有其他大行陸續調高其目標價。
內需股已經成為市場焦點好幾個月，板塊中嘅龍頭股愈升愈有，之前阿Man推介過飲奶身體好，疫情後多咗人關注健康，蒙牛(02319)產品銷量節節上升，蒙牛股價拾級而上，又有大行將目標價調高至55元。其他內需股亦有唔少逆市向上，農夫山泉(09633)、潤啤(00291)、藍月亮(06993)及李寧(02331)齊創新高。講真未有貨嘅，阿Man唔夠膽叫閣下再追貨，皆因呢堆內需股估值已經唔平，若然閣下無畏高症想追貨，只有自己計自己數，追貨後搵定個止蝕位嚴格遵守止蝕。至於噚日死過翻生嘅內地電訊股，得到紐交所放佢哋一馬，今日逆市繼續反彈，只係呢啲股份嘅前景唔見好得去邊，前途難卜下，有貨都好好趁反彈跳車逃生。
今日唔少股份配股，包括去年多次配股，批完股愈升愈有嘅藥明生物(02269)，今年能否一如舊年愈批愈有，阿Man今年有保留，畢竟藥物已累積巨大升幅，今年難以完全複製去年模式，加上近來呢個板塊表現反覆，都係食吓花生算數。除咗藥明，仲有錦欣生殖(01951)同海吉亞醫療(06078)都批股，傳聞兩者都係主要股東減持，前者半日跌6.5%，後者半日跌0.9%，睇嚟後者批股已入強中手。東方教育(00667) 跟建滔積層板(01888)同遭股東折讓減持，但跌幅較上述幾隻醫療股大，主要係呢兩隻股份唔屬於資金擁護嘅板塊焦點股，批完都唔會有乜睇頭。唔係隻隻股好似近日熱炒嘅信義光能(00968)咁，批完再創新高，主要都係要跟大方向做，既然唔係熱炒股，批完見特價亦唔係撈貨嘅對象。
麥狄文
(徐狄怡‧證監會持牌人)
