今晚美股感恩節假期休市，美股隔晚個別發展，道指收報29872點，跌173點；標指收報3629點，跌5點；不過納指升57點，報收12094點創新高；追蹤小型股表現的羅素2000指數也創下新高。美國經濟數據好壞參半，當地上周首次申領失業救濟人數意外增加3萬人，至77.8萬人，為5周高，有別於市場預期降至73萬人。另方面，美國10月耐用品訂單升1.3%，升幅高於市場預期的0.8%，前一個月升幅向上修訂為2.1%。至於港股今早則反覆，恒指高開25點，早段倒跌最多57點，見26612點半日低，之後回勇，曾升61點，見26731點半日高，高低位只有百幾點，窄幅上落。恒指中午收報26672點，升2點，國企指數報10621點，升63點；恒生科技指數半日升40點，報7961點。
藍籌股嘅金融股繼續反彈，友邦(01299)、建行(00939)、工行(01398)及平保(02318)全部上升，大笨象(00005)噚日急升後，今日見回吐。至於地產股跑輸，跌幅較為顯著，普遍跌2%或以上。講真呢啲傳統股升勢能否持續，阿Man有所懷疑，尤其大笨象呢期係威係勢，某程度上，反映市場對其業績見底反彈有一定信心，加上憧憬明年初將恢復派息，帶動股價向上。唔排除喺年底前，股價進一步上試44-45元水平，回補3月底嘅下跌裂口。不過，長線而言，整個金融行業競爭格局仍然激烈，且目前仍然依賴傳統利息及財富管理收入，難有大升空間，只宜短炒，長揸就冇乜着數。
資金繼續於新舊經濟股之間穿梭，今日科技股又做返好啲，JATMX只有小米(01810)半日仍偏軟，騰訊(00700)升1.6%；阿里(09988)升0.8%；京東(09618)升0.8%；美團(03690)升2.9%；不過今次互聯互通擴容，只納入未有盈利嘅B仔，而第二上市股份暫時仍未被納入港股通，網易(09999)半日跌4.2%。
汽車股今日以4S股表現最好，上星期阿Man曾經喺本人嘅收費聊天室推介永達汽車(03669)，今日見大行提升其目標價，股價創新高，半日升4.8%。另外，中升(00881)升1.5%；潤東(01365)升6.5%；美東汽車(01268)升1.4%。
汽車股呢期受捧主要係炒內需概念，除咗汽車股，阿Man就睇住蒙牛乳業(02319)呢隻藍籌內需股。內地重視內循環戰略，主力發展內需市場，本土品牌崛起，加上內地乳業需求穩定加，下半年液態奶增長勢頭持續，蒙牛收入增幅有望達雙位數，其內需概念可捧。股價目前於10日及20日線之間可收集，跌穿38元止蝕，上望43元並創新高。
麥狄文
(徐狄怡‧證監會持牌人)
