美股隔晚喺市場憧憬侵侵可能先通過較細規模嘅刺激經濟方案下顯著上升，但港股呢邊擔心新一波疫情再爆發，恒指連升四日後回吐，不過10日線(23782)跟20日線(23854)仍然穩守。恒指高開20點報24263點，但高開低走，恒指一度倒跌220點，見半日低位24021，其後大市跌幅縮至200點之內。恒指半日報收24053，跌189點；國指午造9562，跌66點；恒科指半日收造7452，跌42點。
藍籌股主要受壓，友邦(01299)跌0.6%；大笨象(00005)跌0.8%；騰訊(00700)跌0.6%；阿里(09988)亦跌0.1%，都係前幾日急升後回吐，對於近日回勇嘅大市升勢無礙。有消息指華為有意分拆旗下榮耀手機業務，小米(01810)股價半日跌4.8%，因為一旦成事，對小米確係一個大打擊。不過，阿Man又唔認為華為可以輕易分拆榮耀手機，畢竟華為正被美國制裁，根本自顧不暇，仲邊有能力搞咁多嘢。
蘋果新機發佈會下周舉行，手機設備逆市做好，半日升得最勁係剛宣布完派特別股息嘅高偉電子(01415)，半日急升近8%。一對蘋概孖寶舜宇(02382)跟瑞聲(02018)分別升2.3%及1.1%，其他手設股普遍做好。光伏股持續強勢，主要係隔晚美股嘅太陽能股集體抽升，港股呢邊嘅光伏股同樣有資金追捧。
黃金周假期過去，假期間遊澳旅客未如預期理想，表現強差人意。而摩通一口氣下調多隻濠賭股目標價，濠賭股捱沽，整個板塊閒閒地跌2%或以上。如今香港或再爆發新一波疫情，近在咫尺嘅澳門亦難有運行。而疫情再爆或再收緊限聚令，稍為回復嘅消費市場或再受打擊，收租股當然捱沽。
反而受惠疫情嘅香港電視(01137)及日清食品(01475)則逆市向上，又係炒疫情概念，講真阿Man寧願疫情快啲過去，都唔想繼續炒疫情受惠股。
麥狄文
(徐狄怡‧證監會持牌人)
