上周港股已連跌四個星期，一共跌咗2186點，不過美股上周五彈得唔錯，今日港股總算識彈一彈。恒指高開48點，開市後升幅收窄至僅餘14點，見23250點半日低，其後再發力，半日最多升186點，見23421半日高位。恒指中午收報23406點，升170點；國指半日報收9353點，升50點；恒科指報收6943點，升24點。呢個星期只有三個交易日，而北水明日開始放假，至下周五回復正常，預期呢幾日都係偏靜。
大笨象(00005)上星期雖創N年新低，但28元世紀供股價總算守得住，加上平保(02318)增持，現為其最大單一股東，股價半日狂彈7.8%。不過平保增持爭有如何，大笨象業績唔掂呢個問題，唔會因為平保增持而解決，上番30元樓上唔代表從此扭轉弱勢，阿Man提醒仲有貨嘅小股東，好趁呢段時間反彈跳車逃生，難聽啲講，大笨象上面層層蟹貨，過得到三十一，都過唔到三十五。至於其他重磅股個別發展，中資金融股有反彈，但本地地產股仍有沽壓。
恒科指反彈，雖然指數未重上7000水平，但今日總算有啲起色，ATMX全線上升，上星期跌到一仆一碌嘅小米(01810)半日升2.4%，廿皮水平失而復得；阿里(09988)跟美團(03690)半日齊彈2.2%，騰訊(00700)僅彈0.2%，主要係旗下微信喺美國命運未知如何，下月中自有分曉。而京東(09618)向港交所(00388)提分拆京東健康上市獲接納，股價半日升2.5%，若然股價能重上10日線，即291元，應該會好些少。至於中芯(00981)傳被美國制裁，雖未致跟華為同樣遭遇被全面封殺，而中芯亦表示未接獲官方通知，並一再強調公司與中方軍背景無關，但大行話之你，先狠削目標價及評級，中芯半日跌5.8%。
恒大(03333)話咗無咁易死，公司極力證明系內公司財政狀況健全，股價反彈11.9%。而旗下恒大汽車(00708) 擬申請首次公開發行A股，喺上交所科創板上市，以配發及發行不超過15.56億股A股，若能透過A股成功集資，無疑可舒緩財務壓力。其他內房股亦顯著反彈，普遍回升4%以上。不過提一提大家，雖然恒大系幾千億負債睇落好嚇人，但相對內地金融機構已借出嘅貸款總額高達165萬億，幾千億真係好碎料，難聽啲講，恒大有乜冬瓜豆腐，阿爺唔一定要伸手援手救公司，皆因恒大並非大到不能倒，呢個表面睇落似巨人嘅企業即使倒下，亦唔會引發系統性風險，若然閣下手持恒大系股份，又係要把握逃生機會跳車。
麥狄文
(徐狄怡‧證監會持牌人)
