熱門:

2019年9月5日 即巿股評 港股直擊

【輪證贏家】恒指牛追補8月5日裂口

噚日揀咗隻恒指牛(54586)出嚟,噚日恒指因為傳出林鄭話(動議)「撤回修例」(佢係收咗市之後先至發表電視講話,對我哋嚟講佢一日未親口講,就一日都係「傳」/「消息指」...但對於個市嚟講,我理得你,總之就炒咗先),就係咁就將恒指搶高到26654點,最多升1127點。雖則收市升幅收窄至9XX點,但過千億成交嚟講,咁大支陽燭都唔會假得去邊,最緊要嘅係(54586)報到仇又買到月餅嘛。

先唔計噚日林鄭個電視講話,用返技術分析去睇,恒指其實處於嗰「三角形」裡面都一段日子,而且波幅愈嚟愈窄,愈嚟愈走向「三角形」嘅尖尖位;同時都留意到恒指波幅指數(VHSI)雖然數值上仍然處於高水平,但由7月中至今已經畫到一條「上升軌」,剛好噚日朝早寫【輪證贏家】時見VHSI落去去「上升軌」嘅底部,一場腥風血雨即將殺到。果然,食完個飯就到咗。

依家再睇返恒指日線圖,「三角形」待變格局已經完咗,依家恒指向上爆,10天線(25888點)同20天線(25865點)噚日已經收復,而噚日恒指仲一度升穿保歷加通道頂部,到今日開市時雖然微跌10點,但到依家10點27分,恒指已經倒升過百點,做緊(...望右諗住睇電視報恒指但電視賣緊廣告添...)26642點,升119點,暫時高位見過26697點,都係一度升穿保歷加通道頂部(26616點)。穿保歷加通道頂係令人有啲忌諱,因為大家都知道呢啲穿得兩三日就要返番入條保歷加通道裡面,但同時見到保歷加通道口拓闊中,換言之保歷加比位大市去行,暫可免除被條保歷加通道打番落去嘅憂慮。

開埋恒指牛熊證街貨圖,下方牛證應該係出唔切去追市嘅,依家最貼價都係25600至25699點,呢度有270張期指,全數新增嘅。至於上方熊證最貼價就係26600至26699點,呢度有相當於140張期指。按依家10點33分計,恒指高位做過26697點,即係話呢140張期指你當同無晒都無乜分別,變相可以當26700至26799點呢度先至係最貼價嘅熊證街貨,而呢度就係熊證街貨最多新增層,有相當於595張期指;至於重貨區就退守至27000至27099點,企喺大位都合理嘅,而嗰層就有相當於603張期指,其實同26700至26799點只係爭8張期指咁大把,反正個市都上到呢個位,點解唔會食埋佢?恒指牛(54838),收回價25700點,同現價有逾900點差距,呢啲牛證已經係市場上最貼價同槓桿最高(約28.6倍),吼恒指5分鐘圖SlowSTC(14,3)見超賣先好落場,進取少少博補返8月5日個下跌裂口(26868點至26502點)都唔奇。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads