熱門:

2019年7月4日 即巿股評 港股直擊

【盤房來料】新城系暫未宜接飛刀

美股喺獨立日假期前贈興,隔晚美股做好,三大指數齊創收市新高。除咗中美貿易關係已見緩和,加上美國近日公布嘅經濟數據顯示,美國經濟開始放緩,聯儲局減息逼在眉捷,市場傾向相信聯儲局本月減息機會極大之餘,減息幅度更可能高達半厘,貨幣重歸寬鬆政策之下,股市水退渠成,自然升完再升。

恒指今早高開36點,報28891,開市後反覆向上,升抵二萬九大關,半日最多升152點,見過半日高位29007點。不過二萬九點阻力實唔嘢少,升抵此關難免有沽壓,大市升幅收窄,其後倒跌47點見過半日低位28807點。恒指中午報收28824點,跌30點;國指報收10913點,跌8點。

重磅藍籌股個別發展,騰訊(00700)跌0.2%,半日報收359.4元;友邦(01299)見過87.3元新高,其後倒跌0.7%;大笨象(00005)跌0.4%,但股價仍守住65元。三隻重磅股合共拖低恒指44點。中資金融股偏軟,內銀股跟內險股均見腳軟。至於瑞聲(02018)跟舜宇(02382)分別跌2.5%及1.1%。半日表現最好係阿Man鍾情嘅中生制藥(01177),壯陽藥獲內地註冊批件,股價一升再升,今早半日一度升半成,半日升3%,係表現最佳嘅藍籌股。其他醫藥股亦有資金追捧,多得天津有意再推政策撐藥企。

噚日提過半新股中煙(06055)升勢過急,炒過籠隨時可能急轉彎,結果噚日午後股價已跳樓急墮,今早繼續回吐,股價半日再跌16%,不過為保百億市值,估計15元呢個位會死守。只係中煙炒咗幾日,由高位向下派發,上面已積存唔少蟹貨,留意派發區喺15至20元,就算頂得住15元,亦唔代表有本事重返高位。

本來人民幣靠穩,內房股當然可做好,不過內房股呢兩日做好之時,亦有例外,新城發展(01030)董事長王振華涉性侵女童被捕,股價昨日已跌24%,即使公司已表示營運不受影響,主席之職亦由王振華之子走馬上任,股價亦再跌12%,燙手山芓未而接,同系新城悅(01755)雖為物管股,但物管股選擇多的事,無謂呢個時候接飛刀。

麥狄文
(徐狄怡‧證監會持牌人 滙盈資產管理‧董事總經理)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads