熱門:

2019年5月30日 即巿股評 港股直擊

【輪證贏家】27000點穿唔穿?

5月30日,陰(得嚟有少少毛毛雨,雨勢唔大,唔開遮唔會死)。依家10點正,同事們陸陸續續咁返嚟,而恒指就剛啱做咗今日暫時低位27069點,跌16X點,連同事買返嚟嘅早餐都未食,恒指就率先食咗27100至27199嗰個牛證街貨,相當於473張期指,而呢一層亦係最多新增嘅一層,無他嘅,可能大家見個市好似跌定咁,咪貼價啲追啲牛證咁囉(我估);又或者落注期結日個市係會表現好啲嘅,因為要埋數嘛,所以又買隻貼價牛博少少咁囉(都係我估咋)。其實,真係無人講過期結日一定會升市,就正如無人講過年年都會出現「五窮六絕」,呢啲都係傳統智慧,你就當佢好似係燙傷搽豉油=傳統智慧啦!

依家10點10分,我有我開包餅咬,個市有個市繼續落,反正第一層牛證都死咗,即係話依家最貼價嘅牛證街貨係27000至27099點,呢度有相當於722張期指,大關口位多貨就梗架啦,事關大家都博呢啲用千位嚟計嘅支持力,同平時嗰啲用百位數計嘅支持力,兩者力度有唔同。

「今日唔穿,聽日都穿架啦!下個星期就『六絕』啦!」先唔理「五窮」之後會唔會出個「六絕」;單睇依家恒指牛熊證街貨圖分布,就估到個市向下殺牛嘅機會仍然大過向上殺熊,一來上方熊證係見有再貼價嘅新貨出,但確實追唔切個市嘅跌勢,最貼價嗰層熊證喺27600至27699點,同現價(10點25分恒指報27032點計)比,入返個門口都要反彈568點;如果要食埋第一層,比多100點啦,師兄。

其次,說實話恒指成個5月咁跌法,去到依家雖然未好肯定咁講個市跌定,但一個「長方形」打破咗條「下降通道」,對於成個月想博反彈但博極都博唔到嘅錢嚟講,同見到一條曙光差無幾,於是再次剔起呢堆錢追貼價牛嘅慾望,如是者團火亦都着咗;但問題就在於呢團火出現咗之後,就會令到貼價牛火速增磅。試問咁重貨又咁貼價,個市又點會放過呢堆肥牛呢?

一個唔該,呢個「長方形」屈返入去條「下降道通」,到時真係邊個都幫你唔到。依家10點41分,望望電視機見到恒指跌幅好似停咗一停,開埋5分鐘圖就見到原來剛啱SlowSTC(14,3)由嚴重超賣上緊去,想入熊證嘅可能真係要等下一轉;或者,過埋呢兩日/大市確認穿27000點嘅話,再殺落去都唔遲。

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:gladyshan@gmail.com;Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。