噚日喺[下半part]都開過個日線圖睇,見到主要嗰五條平均線就嚟倒序排列,呢個訊號除咗話比你知個市大方向係向下行,係一個利淡訊號之外,仲暗示你知將會有唔同「款式」嘅「死亡交叉」出現,就好似噚日見到條20天線(依家見28324點)同條100天線(依家見28331點)愈行愈埋,而今日終於都相交,又一個「死亡交叉」出現。
噚日朝早提過恒指處於「下降通道」中牌位,呢啲兩頭唔到岸嘅位置確係無心落場;今日再睇,呢條「下降通道」似乎喺星期一(5月27日)倍咗,而關睇返日線圖上最近五個交易日(計埋今日),其實似乎生緊個「長方形」出嚟,「長方形」有整固/待變嘅味道。
睇緊恒指牛熊證街貨圖,下方最貼價嗰層牛證27200至27299點嗰27張期指,但按依家10點32分恒指暫時最低做過27178點計,呢個位嘅街貨已經全數死亡,雖則呢個位大市係今朝開市15分鐘後到向下殺咗落去,不過見5分鐘圖SlowSTC(14,3)落到超賣位,大市即見反彈,到依家跌幅收窄至86點,做緊27304點,而5分鐘圖SlowSTC(14,3)只係剛剛上到「7」字頭,即係話大市其實仲有位可以再繼續向上升上去,問題係佢上唔上咁解。
「上嘅話咪會殺熊囉?」按恒指牛熊證依家熊證最貼價嘅係27600至27699點,呢度有相當於293張期指,不過要個市上返呢個位,就即係等同大市先要突破「長方形」,跟住再比力向上升,企圖/意圖去補返上個星期四(23日)個下跌裂口(27523至27640點)...唔係話佢唔得,只係喺呢個咁弱雞嘅市況,短期內係有啲難。
下行似乎都係暫時大市方向,況且今年「五窮」似乎應驗咗;如是者就仲有三日就開始「六絕」,既然依然恒指困自己喺個「長方形」裏面,就由佢Hea多日先啦。
作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。