美股業績期繼續,但隔晚Caterpillar跟Nvidia嘅業績唔多掂,前者拖累道指一度跌逾400點,後者則拖累科技股插水,令本來噚日已高位回吐,開始乏力嘅港股喺隔晚ADR及夜期時段先見腳軟。加上美國正式起訴華為及華為公主,並提引渡,道指期貨繼續腳軟,港股半日跌逾百點。
恒指低開179點,最多跌逾200點低見27397點,其後跌幅曾收窄,半日高位見27499點。上半場時間喺27400至27500之間上落,呢個位正正係好淡分界處,能夠企穩27500點之上,好友仍有機會搶攻至二萬八水平,相反於27400點下運行,則大市或回調至27000至27200點尋找支持。留意明日為期指結算,結算過後淡友會否還擊,話晒整個1月份淡友被逼至牆角,只要華為事件再度惡化,及中美貿易談判稍有差池,淡友肯定借勢反擊。暫時指數支持位喺27000點,失守27000點或直指26600水平,炒市嘅朋友自己執生。受華為事件影響,內地股市跌勢較急,上證指數曾挫1.4%,半日跌幅收窄,港股亦乘機守住27400點。
重磅股普遍下跌,騰訊(00700)跌唔夠1%都算係咁,暫時喺340元左右爭持,留意335元為呢一輪升浪嘅止賺位,跌穿呢個位,就算有平貨喺下面買咗都要提高警覺。雖然發改委已開到口要促進汽車消費,但之前阿Man講咗N咁多次,內地汽車製造業面對開放市場後,外資進場所引起嘅競爭,未來日子唔好行,汽車股炒都係短癮,阿Man就索升當睇佢唔倒。
雖然美國司法部已決定刑事起訴華為公主及公司,但內地發展5G嘅決心應難動搖,早段中國鐵塔(00788)雖然曾跌逾4%,但至中午跌幅已收窄至不足1%,股價似乎喺1.6元水平有不俗支持,當作中線投資,1.6元附近可以博一博。通達(00698)完成5G天線振子研發,半日大升19.5%,不過通達上面蟹貨一籮籮,過得到1元先有條件再向1.2元挑戰,而1.2元為之前橫行小平台,都唔係話咁容易就收復。
話時話仲有三個半交易日就過年,其實呢幾日預咗成交會縮水,至於港股二月份能夠承接一月份升勢再下一城,好睇中美貿易談判會否為市場帶嚟好消息。但暫時牌面睇短線淡友做唔過,牛熊證街貨仍然失衡,而未死心嘅淡友將戰線拉長至28000至28100點,只要貿易談判有好消息,挾高幾百點KO呢堆熊仔無難度。
麥狄文
(徐狄怡‧證監會持牌人)