仲記得2月頭凍到傻，走去電器鋪同人搶暖風機買，開咗三日之後天氣回暖；到前兩日又無啦啦落毛毛雨，感覺又有少少涼。今朝睇電視，天文台又話下個星期溫度又會上升，呢啲又凍又暖嘅天氣，同恒指呢五日梅花間竹、日升日跌一樣，兩個字講晒：「玩死」(你鍾意係中間加多個字都得嘅)。
單計呢五日恒指粒燭嚟睇嘅話，20天線(31407點)同50天線(30900點)好明顯夾住恒指個勢，仲開始生咗個「長方形」出嚟；被條20天線頂住又即係話依家仲處於保歷加下降通道，但已經由個底慢慢上返到中軸咁解。轉個黃金比率(Fibonacci)出嚟睇(無錯，呢個圖係我又搵我哋個Designer Priscilla幫手畫嘅)，由今年1月29日高位33484點向下度到上年12月7日低位28134點計，又咁啱計到0.382(31440點)同條20天線只係爭33點，幾乎重疊咁滯；至於0.5(60809點)同50天線都只係相差91點，怪不得個市被呢兩條線夾到實一實。
無他嘅，正所謂：「頂就用嚟破，底就用嚟托」，雖然幾時破同破唔破就無人知，依家10點51分，mark底恒指做緊31320點，最高暫時見過31386點，用呢個位嚟計嘅話31200至31299點，即係最貼價嘅熊證就已經全數死亡，呢度只係有27張期指存在啫，而恒指踩入嘅31300至31399點呢度，就得8張期指咁大把。至於熊證重貨區就係31500至31599點，呢度有相當於894張期指，如果大市上到得呢個位而食晒呢part期指嘅話，就係即個市會升穿條20天線啦。
再睇睇下方牛證，最貼價嘅係30400至30499點，呢度有1778張期指，係就係重貨區，但同現價比嘅話都有成920點嘅差距，萬一個市寧願遠征都要向下衝食重貨嚟講，即係先跌穿條50天線之餘，仲要穿埋條10天線(30546點)先安落。
咁遠水路...嚟緊又有重磅股公布業績，除非騰訊(00700)無錢賺啫，否則暫時都未諗到要山長水又遠咁向下行嘅原因/藉口。按大市Chok過林峯嚟講，開Call比較穩健，宜選貼價、中期Call輪，博一下子由價外變價內嘅爆炸力，將輪價炸上去。
作者阿珊，從事財經及投資版報道超過10年，由平面媒體走到網絡世界，《鐘擺戰策贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]
