隔晚美股道指跟標指又創收市新高，港股噚日回吐304點後，今早收復失地，再創歷史新高。恒指今早高開180點，早段曾見32794點半日低位，但喺內銀股勁升及騰訊(00700)強勢反彈下，收市前升幅擴大至最多435點，創33089歷史新高。恒指中午報收33083點，升429點；國企則升290跌，報收13678點。
重磅股四大股王，又係大笨象(00005)最失威，半日逆市跌一個位，唔知幾時先肯發力。騰訊強勢反彈，半日升11.6元，完全收復噚日失地，半日報收469.6元，但470元未上番去，暫時都只係反彈。至於港交所(00388)半日升5.8元，報收298.8元，又係300元前止步。至於平保(02318)今日亦反彈逾2%，半日報收93.95元，要回復強勢，股價要先重上95元。
雖然幾隻重磅股目前只係反彈，但有內銀股接力，大市一樣創新高，今日終於輪到阿Man鍾情嘅建行(00939)勁升4.4%，創8.95元新高，係表現最好嘅成分股。其他內銀股普遍升3%或以上，次一線嘅內銀股表現同樣強勁。人民幣走強，可能係內房股持續強勢原因，今日內房股又回勇，加上內房股不約而同發盈喜，二線內房股升幅更大。
人民幣連日上升，有利以美元舉債，但人民幣為收入嘅中資航空股，國航(00753)創超過7年新高，半日升3.3%，南航(01055)升勢最勁，半日升近8%，創兩年半高位；而東航(00670)同樣升至兩年半高位，半日升4.5%。雖然油價上升對中資航空股不利，但人民幣升幅應能抵消油價升嘅不利影響。
油價高位回吐，「三桶油」威咗幾日幫手頂住個市，今日有內銀發力，又有重磅股反彈，石油股功成身退，隨油價回吐。中石油(00857)跌1.1%；中海油(00883)跌2.8%；中石化(00386)跌2%。而升得勁嘅油服務，回吐亦較急速，其中安東油田服務(03337)曾挫11.8%，半日跌6.6%，成交大增小心派貨。百勤油服(02178)跌6.8%；海隆控股(01623)跌3.2%；宏華(00196)跌3%；中海油服(02883)跌2.1%。
本以為港股結算前都喺咁先，今日又重上三萬三點創新高，但阿Man堅持happy Friday，喺現水平唔會掃貨加注，反而把握機會再減磅套利作兩手準備。話就話穿頂唔估頂，始終由12月28200點回升至今，累計升幅超過4800點，短線再大升空間有限，反而作適度當整，呢個牛市先可以好好行落去，升勢過急過快，怕無以為繼，想長玩長有，期待結算後一個較似樣嘅調整。
麥狄文
(徐狄怡‧證監會持牌人)
