踏入2024年港股仍然似未有準備好蓄力爆上的感覺，今日大市雖然在下午開始拗腰低位回升，最後收市恒指微跌不足1點，惟低位處亦未見資金願大量湧入情況，到完場收市全日成交又係只得703億元，港交所（00388）真係死比佢睇，幾時先可重返2021年見回500元價位。
高息股亦要輪流炒作搵食
港股抬唔起頭除大市成交偏低之外，亦要等中央利經濟政策出台，不過今日上證方面既然表現不濟，就連帶港股亦無運行，大市資金雖然依然偏向低殘高息股裡埋手，但這類個股近日已被追捧到開始初見有些出現輕微獲利回吐情況，若然大市仍處於現水平上上落落的膠着狀態，小心過去半個月曾被追捧該些個股將會陸續出現回吐情況，變成被市場資金只輪流炒作的工具來等大市轉勢，其中中國電信（00728）及粵海投資（00270）就似率先有少少獲利回吐跡象，至於其他如中國神華（01088）、兗煤澳大利亞（03668）等就要留意，雖然兩者今日仍處可收升位置，惟後者今日盤中見動力於下午反而減弱有持貨者或許加多一眼留意。
成個市場就係得個六七百億
預計近日仍可強勢再上的就非兩桶油莫屬、中石油（00857）及中海油（00883）就因地緣政治因素預期短期仍將受到追捧，油價在連挫4個交易日之後受紅海原本胡塞武裝組織事件以外，現在出現伊朗軍艦部署進入紅海，黎巴嫩境內哈馬斯高層遭擊斃，再加上伊朗境內宣稱受到恐襲導致逾百人喪生近200人受傷，一切矛頭直指以色列及美國，事件擔心隨時有擴散的可能性存在，事情至此內地上證開局亦都不似預期，外圍又風頭火勢隨時辣着開大戰。此刻當資金唔敢隨便就去壓注、只有周圍找較安全的炒炒吓等消息，就算強如科技龍頭股王騰訊（00700）、其實都係由去年9月中至今仍一直處於300元上下各一成水位炒來炒去等運到，因此低殘高息股亦走不出資金唔願入市的惡咒，因為資金就係得果6、7百億來操作，最叻亦係只得高沽低揸炒波幅的伎倆來等等等，因此就算你極低殘價位買到亦唔代表可以一路升到盡又或者所謂合理價，因為只要有水位資金就會套利另投他去的。
梁健雄
筆者未持有上述股票
編按:作者梁健雄，香港財務策劃人員總工會副理事長，從事金融業逾20年，曾任職多份報章包括英文虎報、南華早報、華爾街日報等後勤製作部工作。《炒股讀心》逢每周四跟讀者分享投資心理
