隔晚美國公布9月CPI略高於預期，但美債反應比較大，兩年債息再度升穿5%水平，反映市場再度憂慮聯儲局再度收緊貨幣政策，美股借勢回吐，三大指數下跌，道指跌173點，標指跟納指分別跌27點及85點，暫時美股表現仍然反覆。美股回吐，加上港股已連升六個交易日，加上日線圖開出三個上升裂口，到第三個裂口為消耗性裂口，就算升勢未完，都要調整，今日順理成章回吐。再加埋內地貿易數據續跌，港股更大條道理回一回。
恒指低開291點，跌幅一度收窄至224點，見18013半日高位，可惜萬八關得而復失，隨後跌幅擴大，最多跌396點，見17842半日低位，半日挨近低位收市。最終恒指半日收市跌385點，報17852；國指收報6135，跌131點；恒科指半日跌126點，收3892。半日成交額453億元，乏善可陳。
隔晚反映中概股嘅金龍指數跌逾3%，重磅科網股全線向下，京東(09618)跌得最慘烈，主要係有大行唱淡，將本來已弱勢嘅京東再推多一把，半日跌12%，再穿上市新低，當然係成為表現最差藍籌股。阿里(09988)跟美團(03690)半日跌逾3%，騰訊(00700)半日跌2.7%；百度(09888)跌半成，其他科網股普遍跌2%以上。
得到國家隊撐場嘅內銀A股，H股未見有資金跟進，今日四大內銀股全線回吐，跌幅由0.6%至1%不等。其他金融股亦受壓，平保(02318)半日跌1.5%；大笨象(00005)半日跌1.1%；友邦(01299)半日跌近3%，港交所(00388)亦跌1.8%。
生科股近日有資金追捧，今日就算大市回吐，呢個板塊仍無大礙，逆市做好，翰森製藥(03692)半日升4.3%，成為表現最好藍籌。藥明生物(02269)半日升0.7%；信達(01801)半日升2.7%，聯邦制藥(03933)更曾創52周新高，半日升5.3%，其實中國面對人口老化問題，藥股的確係比較有前景嘅板塊，之前因為打貪，目的都係為咗藥價可以去到一個民眾能夠負擔嘅水平，同去年監管科網企業，窒礙行業發展有分別。完成醫藥改革，令到行業更健康發展，長遠嚟講反而係好事。不過呢個板塊走勢一向飄忽，睇好前景都係吼跌嘅時候買，升嘅時候追貨，要有心理準備要坐住等。不過大方向嚟講，內地以國產藥品取代進口藥嘅方針下，醫藥股係比起其他板塊更有前景，值得睇高一線。
汽車股低走，遭基金股東IDG資本減持的小鵬(09868)半日跌3.1%；比亞迪(01211)跌1.5%；蔚來(09866)跟理想(02015)亦腳軟。其實汽車股，尤其電動車股，面對行業競爭，更已開打減價戰，產量高嘅車企如比亞迪及龍頭Tesla仲可以透過數量去做到薄利多銷，維持收入，但規模較細嘅車廠，缺乏規模效益，要捱過競爭唔容易，或者最終只有走上被併購之路。
美債息回升，外圍市況轉弱，港股本來已係底子弱過人，即使阿爺預告再出招，國家隊亦入場買內銀股，係會令氣氛改善。但國家隊掃貨唔全面，兼且銀碼細，對大市刺激亦相當短暫。噚日港股上試50日線後，夜期再失守，及失守萬八大關，短線回試20日線即17700水平機會大，至於10日線約17630，守得住17600及17700水平，都仲有機會挾淡倉，但都只限於挾倉，港股要真正轉勢回升，真係唔知等到何年何日。
麥狄文
(徐狄怡‧證監會持牌人)
