美股隔晚走軟，三大指數跌逾1%，主要係今年股王Nvidia(NVDA)公布業績後，股價高開低走，收市幾乎抹去全部升幅，拖累科技股表現。另一方面，市場靜待鮑爺喺Jackson Hole全球央行年會演說，能否從中得到未來息口走勢嘅線索。至於港股隔晚喺ADR及夜期已跟隨美股回落，今早反覆走軟，結束之前幾日反彈，更一度跌逾200點，失守萬八大關。不過半日波幅有限，高低位僅相差108點。
恒指低開174點，跌幅一度擴大至236點，見17975半日高位，但萬八點有支持，跌幅收窄至128點，見180984半日高位。半日恒指報收18024，跌187點；國指半日跌64點，報收6202；恒科指半日報收4075，半日跌82點。半日成交額只有437.48億元，周末前久成交迷低屬意料中事。
藍籌股個別發展，大笨象(00005)半日跌0.9%；友邦(01299)跌勢未止，半日再跌2.8%，港交所(00388)跌0.3%；中移動(00941)亦跌0.3%。不過內銀股逆市做好，四大內銀股分別升0.7%至1.4%，至於科網股全線走軟，除咗係隔晚美股嘅科技股唔精神外，出完業績又見光死嘅美團(03690)跟網易(09999)均公布完業績下跌，前者業績標青，但對第三季業績預期保守，加上業績前已從低位偷步炒高超過一成，隔晚ADR股價亦升唔穿噚日收市價，今日即裂口低開，半日跌逾半成；至於網易業績差過預期，半日同樣跌半成。其他科網股跟隨走軟，騰訊(00700)業績後又可以回購，半日跌1.2%算跌得少，百度(09888)半日亦僅跌1.2%；但其他科網股跌幅普遍超過2%。
人民幣見過低位後反彈，重上7.30水平之上，內房物管股逆市反彈，碧桂園(02007)跟碧服(06098)半日分別升7.8%及5.2%，成為表現最好兩隻藍籌股，其他內房及物管股，升幅由超過1%至5%不等。不過呢兩個板塊失救已成事實，超賣後技術反彈，唔代表雨過天晴可翻身。
港股經過幾日反彈後，噚日嘗試挑戰10日線後未能守穩，若然今日再度失守萬八大關，反映本輪跌勢將持續，恒指至少要修復10日線，先有機會擺脫目前跌勢，組織反彈。加上喺前幾日反彈期間，成交額未見明顯增加，只有大約1000至1100億左右，只可以話有少量資金喺萬八水平流入趁低吸納，但未見有大量或新資金入場掃貨，缺乏成交下，反彈力自然有限，更莫講話結束跌浪從新出發。
麥狄文
(徐狄怡‧證監會持牌人)
