隔晚股神畢非德旗艦巴郡績後股價創新高，帶動美股回升，道指升407點，標指升40點，納指則升85點。較早前VIX升破17，需要提防美股隨時回調，作深度調整，點知一兩日後VIX再度回落至15.77，反映美股氣氛仍然強勁，稍有回落即見有資金入市低吸。不過，人民幣再度走弱，隔晚中概股走軟，夜期跟ADR回落至19400水平。今日港股續跌，主要係中國進出口數據差過預期，說好啲重啟經濟後復甦似乎遙遙無期。
港股今日低開229點，喺人民幣弱勢下，跌幅拉大至接近400點，跌393點，見19144半日低位，不過A股止跌回升，港股跌幅一度收窄至167點，見19370半日高位，可惜250天線(19297)得而復失，喺內地公布進出口數據後，跌勢持續。半日恒指收報19270，跌267點；國指跌111點，報6622；恒科指更跌逾2%，挫96點，收4403。半日成交額較上日增加至543.16億元。
藍籌股幾乎全面向下，ATMJB全線走軟，阿里(09988)、美團(03690)跟百度(09888)半日跌逾2%，京東(09618)半日更逾3%，騰訊(00700)半日跌1.8%，係五大科網股中跌得最少。至於內銀跟內險股亦普遍下跌，金融股之中只有大笨象(00005)逆市升0.6%，友邦(01299)半日跌2.2%；平保(02318)跟港交所(00388)分別跌1.9%及1.8%。至於少數升嘅藍籌之中，宏橋(01378)無啦啦升半成，成為最佳表現藍籌股。
人民幣又走弱，內房跟物管股就閉翳，龍湖(00960)半日跌近一成，藍籌之中跑第尾。其他內房股閒閒地跌半成或以上，屬於阿爺旗下嘅中國海外(00688)跟華潤置地(01109)半日分別跌1.7%及3.7%，算跌得少。至於物管股跌3%以上係基本，復牌無耐嘅恒大物業(06666)連蚊股身份都無埋，跌穿早幾日復牌低位，話咗呢啲股份唔好接飛刀，即市短炒即日計數當玩泥漿摔角，走似半步博過夜，隨時一身泥濘。
阿爺上周公布刺激經濟措施，要打組合拳，套拳要點打似乎未有使出任何招數，反而就倡議全民皆股，鼓勵民眾入市，從股市中尋找財富，從而推動消費，刺激經濟。要鼓勵民眾入場，券商提出減少交易成本，再提減印花稅。阿爺減唔減印花稅係未知數，但券商先落鑊炒返轉。今日內地券商股跑出，普遍錄得接近1%至超過4%升幅。
不過要阿Man去追券商股真係睬佢都傻，只要望望呢兩日嘅醫藥股死得幾咁慘烈，絕對唔會令阿Man有膽量去追券商股。上周初阿爺仲係口口聲聲話支持自家創新藥物發展，醫藥股威咗唔夠兩日，轉個頭阿爺又話要反貪腐，整頓行業優化改革，結果醫藥股呢兩日又被血洗。內地嘅政策風險，係難以評估到一個令外資完全唔可以信任嘅地步。依家外資唔入場，就鼓勵自己人入場，只係做咗韭菜咁多次，就算未死心，荷包都乾塘，仲邊有閒錢入去同你博。
麥狄文
(徐狄怡‧證監會持牌人)
