上周五美股繼續做好，市場對企業發布嘅業績感滿意，三大主要指數向上；而反映中概股表現嘅金龍中國指數更升7%，口痕友話科技股女燈神木頭姐盡沽中概股，令中概股一洗頽風，再加埋阿爺發功，金龍指數創下1月以嚟最大升幅亦合理。另一方面，人民幣上周回勇後走強，今早離岸價更曾升至7.13水平，帶動中港股市做好，港股半日一度升逾400點，創三個月高位，半日成交額達995.42億元，總之有返啲睇頭。
恒指高開320點，內地公布中國7月製造業PMI升至49.3，雖然仍處於50點好淡分界線之下，但好過預期，帶動恒指一度升444點，見20361半日高位兼創三個月新高，其後升幅收窄至246點，見20163半日低位。中午恒指報收20208，升292點；國指半日升155點，報收6964；恒科指半日升143點，盤中一度高見4688創半年高位，半日報收4688。
騰訊(00700)半日報收356.6元，半日升幅收窄至1.8%，高位見363元，未到365阻力已調頭；美團(03690)同樣未能上破150阻力，半日升5.7%，但企唔企得穩都仲要睇到收市。至於阿里(09988)仍無法重返紅底股，盤中高見99.75元，半日升2.4%。幾件重磅科網股已佔去恒指過半升幅。至於港交所(00388)半日升幅收窄至不足1%，高位336元僅曇花一現。其他金融股普遍做好，內銀股跑贏，升幅由超過1%至2.6%不等。不過濠賭股高開低走，半日倒跌，金沙中國(01928)半日跌3.6%，成為表現最差藍籌股。
發改委發布《關於恢復和擴大消費的措施》，涉及汽車、住房及家電等，住建部明確政策支持方向後，一線城市中北京、深圳、廣州相繼表態，將適時優化房地產政策。刺激相關股份做好，不過內房股先升後回，升幅收窄。富力地產(02777)一度升逾兩成，半日升17.8%，內房股中表現最好。其他內房跟物管股均見上升，但半日升幅收窄。不過世茂(00813)復牌被洗倉，半日收低位，跌逾六成。海底撈(06862)表示中期持續經濟業務利潤大增近30億，股價半日急升近13%，係表現最好藍籌股，其他餐飲股普遍升半成或以上。
由於市場憧憬阿爺會持續出招救市，令整體氣氛好轉，不過目前港股仍然有一大問題未解決，就係缺水嘅問題。雖然半日成交額已增至近千億元，但以指數重返20000計算，成交額日均需達1700至1800億先可以叫價量齊升，否則只係股價升咗，成交額隨之上升，但交投量則未見顯著增加配合。要做到價量齊升，必要外資重返中港市場，目前外資對中港股份前景仍半信半疑，未見積極流入。只要望住個港匯，雖然已由7.85水平反彈至7.8水平左右，但若然真係有大量資金流入，應升至強方兌換保證7.75，金管局要接美元買盤，沽返港元，但暫時未見呢個情況出現。
麥狄文
(徐狄怡‧證監會持牌人)
