美股隔晚先升後回，三大指數報跌收市，但有消息指國有大行拋售美元，令人民幣回穩，港股今早隨人民幣反彈，恒指五個交易日跌1246點後，反彈逾300點，重上19000水平，但受制20天線(19192點)，不過暫時止住跌勢。
恒指高開57點，升幅一度收窄至48點，A股升勢擴大，港股重上19000大關，最多升318點，見19112半日高位，其後升勢略為回順。半日恒指升292點，收報19086；國指則報6483，升111點；恒科指升86點，收3958。半日成交仍然淡薄，只有459.95億元。
藍籌股普遍反彈，ATMJ全線反彈，阿里(09988)計劃分拆旗下物流業務菜鳥及新零售業務盒馬上市，目標最快於今年第三季提交上市申請，阿里半日升2.5%。騰訊(00700)跟京東(09618)齊齊升逾2%；美團(03690)升1.7%。至於三隻重磅金融股，大笨象(00005)跟港交所(00388)半日升逾1%，友邦(01299)則反彈2.1%。
人民幣止跌反彈，內房股跟物管股亦有返啲起色，半日整個板塊反彈，當中龍光(03380)與合景泰富(01813)共同發展的本港樓盤，有消息指獲長實(01113)洽購，龍光半日升一成，合景更升逾17%。其他內房股升幅由超過3%至7%不等。至於物管股亦全線反彈，升幅由接近2%至一成不等。
至於噚日逆市向上嘅生科股，今日見回吐，阿Man都講過呢個板塊只宜低吸，加上在目前利率環境下，對於有龐大融資需求、又未錄得盈利嘅生科企業並非好事，即使個別股份具研發能力，以及研發藥物商業化嘅能力較高，亦只宜低位分段收集，不宜高追。今日呢個板塊跌幅由低於1%至半成不等，相對噚日嘅升幅，回吐壓力唔算太大。濠賭股係另一個逆市下跌板塊，強預期、弱實現下，本來呢個板塊都唔算強勁，半日逆市向下亦唔意外。
目前港股估值低迷，可惜欠缺資金流入，都係難有作為，但由於估值偏低，已有家族向旗下公司提出私有化，新創建(00659)半日升一成，獲周大福企業提全購，同系亦有持股嘅新世界(00017)計劃派特別息，新世界半日升5%。
港股喺周四期指結算前反彈，不過目前仍未收復任何一條平均線，估計結算及半年結過後，向下機會較大，呢兩日就再觀察一下，睇睇港股係托住結算轉倉，抑或能守於萬九之上，於7月再延續反彈。
麥狄文
(徐狄怡‧證監會持牌人)
