隔晚聯儲局一如預期加息0.25%，會後聲明暗示會停止加息，但鮑爺仍口硬，未有表示今年內會減息，美股三大指數隔晚報跌收市。不過港股喺北水回歸，A股假後復市造好支持下，半日低開高走，升近200點，但卻受制10天線(19907點)，但總算守住250天線(19718點)。
恒指低開3點，報19695，為半日低位，其後回升最多275點，見19974，可惜二萬大關可望不可即，升勢放緩，10天線得而復失。半日恒指報收19899，升199點；國指升104點，報6694；恒科指則升25點，收3858。半日成交額略為回升至534.52億元，回復北水未缺席前水平，但暫時仍未見新資金流入，悶局難以突破。
藍籌股個別發展，大笨象(00005)跟友邦(01299)半日分別跌0.1及0.2%，ATMJ只有騰訊(00700)半日跌0.2%，阿里(09988)、美團(03690)跟京東(09618)反彈。不過內銀跟內險股表現突出，撐起大市，平保(02318)半日升6.2%，藍籌之中表現最好。其他內險股閒閒地升3%以上，當中以太平(00966)半日升7.3%，成為表現最好內險股。內銀股亦向上，工行(01398)跟建行(00939)半日升逾2%，招行(03968)更升3.5%。
金價愈升愈有，已升至兩周高位，金礦股持續跑贏大市，之前阿Man喺其他平台推介過嘅招金(01818)半日升逾半成，金礦股之中表現最好。火電股略為回調後又落鑊，今日回勇造好，當中以大唐發電(00991)半日升逾半成表現最好，其他火電股升超過1%至3%不等。
北水今日回歸港股叫彈返啲，暫時守住條250天線，未至於被判死刑，但成交薄弱，市寛不足問題一直存在，即使今日成交額回升至1000億左右，仍然係未見有新資金流入。金管局再接港元沽盤，反映外資喺市場沽貨後，一去無回頭，僅靠北水力量，港股連二萬大關都未必能收復，莫講話重返多條移動平均線之上。雖然傳統五窮六絕月，港股未必一定跌到一仆一碌，但成交欠奉下，唔插水都陰乾，留意250天線19700水平久守必失，除非有資金流入，否則阿Man都係維持港股有波幅，冇升幅嘅睇法，小心失守250天線後，最低消費插水千點，或向18800至19000水平搵支持。
麥狄文
(徐狄怡‧證監會持牌人)
