美股隔晚偏軟，三大指數跌逾1%，反映中概股嘅金龍指數亦跌逾3%，隔晚ADR跟夜期齊齊插水，加上人民幣離岸價又跌至半個月低位，令港股今早低開。不過隨着人民幣低位反彈，加上港股連跌3個交易日後，今早低開高走見反彈，半日恒指倒升逾百點，重上250天線(19725)。
恒指低開96點，報19520已屬半日低位，人民幣止跌回升，港股亦掉頭向上升最多155點，見19773，並修復250天線。半日恒指收報19733，升116點；國指升45點，報6647；恒科指倒升51點，收3875。不過半日成交額只有524.8億元，暫時未見成交增加，即係資金始終唔願入市，未見大量趁低吸納買盤湧現。
藍籌股唔少低開高走，友邦(01299)就平開後回升，半日升1.6%，現價係多條移動平均線嘅匯聚區，能夠企返穩85元，走勢會大有改善。港交所(00388)連跌五個交易日後，今日喘定，半日僅升0.1%。ATMJ低開後反彈，只有阿里(09988)半日仍要跌0.7%，主要係公司旗下阿里雲，宣布有史以嚟最大規模減價；京東(09618)創上市新低後，今早平開並率先反彈，半日升3.6%，但係咪真係見底唔敢講，仍有待觀察。至於美團(03690)跟騰訊(00700)半日倒升。大笨象(00005)跌0.3%，國壽(02628)跌逾2%，藍籌之中跑第尾。
火電股今日有資金追捧，華能(00902)首季盈利升增超3倍，股價半日升8.3%，帶動其他電力股向上，不過只有火電股受惠，新能源電力股未見有表現。反而光伏股又因為A股龍頭陽光電源首季淨利潤升逾1倍，股價半日升逾一成，帶動本港光伏股炒上。不過電力股同光伏股一向難炒，加上本身港股氣氛就麻麻，欠缺成交之下，只會有波幅，冇升幅。
至於大市連跌幾日，落到250天線呢啲支持位，穿一穿反彈都正常，不過上面幾條平均線嘅匯聚區20300失咗，大方向都係易跌難升，加上一直欠缺成交支持，呢兩日反彈結算就算上返20000點，都可能只係死貓彈。
麥狄文
(徐狄怡‧證監會持牌人)
