美國周三公布CPI已顯示通脹正降溫，再加上隔晚公布3月份PPI下跌，加上上周首申失業救濟人數反彈，令市場相信美國聯儲局好快會暫停加息，投資者樂觀情緒高漲，隔晚美股做好，帶動港股高開。恒指高開78點，其後一度升138點，見20482半日高位，可惜無以為繼，講到底又係無成交乏動力，港股扭轉升勢倒跌最多47點，見20297半日低位，中午收市前收復失地，恒指半日報收20344，跌不足1點；國指跌2點，報收6872；恒科指跌29點，報收4130。半日成交額只有577.47億元，周末前夕成交淡靜都合理，不過港股都靜咗一般時間。
藍籌股個別發展，友邦(01299)跟港交所(00388)半日分別跌0.5%及0.1%；重磅科網股亦普遍走軟，ATMJ只有阿里(09988)半日升0.05%，幾乎持平，騰訊(00700)半日跌0.5%、京東(09618)跟美團(03690)分別跌1.7%及2.1%；百度(09888)半日跌4.2%，藍籌之中表現最差。不過中移動(00941)跟大笨象(00005)兩重磅股半日分別升0.8%及0.7%，支持大市跌幅收窄靠佢哋。
市場不僅相信美聯儲局或於5月再加息0.25%後停止加息，甚至有預測指最快於7月減息，雖然阿Man就唔認為美國會咁快減息，但年中之後暫停加息機會大，加上有機會今年第四季減息，美滙指數走軟好正常，更回落至近一年低位。美滙指數下滑，帶動商品價格做好，商品股又乘機落鑊，除咗金礦股之外，其他資源股有資金流入，當中宏橋(01378)半日升近半成，為最大升幅藍籌股。
至於汽車股跟火電股今日亦見有資金追捧，汽車股中以長汽(02333)半日升8.8%最勁，就連持續被股神減持嘅比亞迪(01211)半日亦升1.7%，似乎市場已完全消化股神減持嘅利淡因素。而Tesla連番減價消息亦已消化，但都喺嗰句，有心買貨都等回吐嗰日，升嘅時候就無謂追貨。反正港股都係上上落落，無新資金流入，缺乏資金動自然乏力向上，基本上現水平，就係仍未能吸引到長線投資者入場，暫時入場炒作嘅資金都係超短線，形成港股唔上唔落嘅悶局。
暫時恒指嘅10日(約20339)及50日線(約20377)幾乎滙聚一齊，指數就係呢個水平附近爭持，好友淡友都無乜邊個有特別優勢，成交維持淡靜，加上周末前夕，缸邊友更加無心戀戰。
麥狄文
(徐狄怡‧證監會持牌人)
