美股隔晚表現反覆，喺矽谷銀行(SVB)成功出售部份業務後，市場就銀行風暴一事嘅憂慮暫時緩解，但債息回升不利科技股，納指跑輸，跌52點；標指跟道指偏軟，分別跌6點及37點。雖然美股無乜動靜，但港股就比較精彩，因為阿里巴巴(09988)周二收市後宣布啟動新一輪公司治理改革，將設立六大業務集團，未來有可能獨立上市，受消息刺激，其ADR股價急升15%。由於阿里日後或分拆業務獨立上市，有利釋放價值，股價急升同時亦帶動恒指重上20000大關，成功收復20天及250天線，即19800水平。
今早期指裂口高開563點，升幅一度擴大至653點，見20437半日高位，亦創下三星期高位，不過投資者未有持續追貨，冚倉盤撤退後，指數亦急回，升幅削半至338點，見20123半日低位。中午恒指收報20162，升378點；國指升142點，報6872；恒科指升112點，收4256。半日成交額急升至828.26億元，當中阿里、騰訊(00700)跟美團(03690)成交合共248.35億元，佔去大市成交三分一。不過三股未能高收，騰訊更較開市價低超過10元，始終市場較為保守，未有積極高追。
阿里半日勁升13.2%，藍籌之中升幅最大，更為恒指貢獻206點升幅，不過阿里之前就螞蟻是否啟動上市，已多次狼來了，公司今次啟動改革，旗下業務分拆上市十劃未有一撇，短線興奮過後，或又回歸平淡，始終未能重返紅底股。阿里嘅好消息，帶動其他科網股造好，騰訊跟美團半日分別升2%及4.8%；京東(09618)半日升2.5%，百度(09888)則升1%，但網易(09999)卻逆市下跌，早段曾創145.8元月內高位，半日倒跌0.5%。其他重磅藍籌股個別發展，港交所(00388)半日升近3%，友邦(01299)升1.4%，但大笨象(00005)半日則跌0.2%。比亞迪(01211)去年多賺4.5倍，股價半日升3.2%，但220元阻力未能突破。
內房跟物管股半日受壓逆市下跌，沽壓更唔嘢少，主要都係因為業績問題，雅生活(03319)上年少賺兩成，股價半日急跌13.3%；合景悠活(03913)預期去年利潤跌幅唔少過九成，半日股價亦跌一成。其他內房跟物管股偏軟，跌幅由1%至6%不等。
中字股之前威威，但嚟到今個星期已轉勢，主要係市場對國企改革嘅熱情冷卻，喺未再有新消息公布前，呢啲中字股都要回吐整固。中字股跌幅由0.4%至超過3%不等，呢期中概股炒返上嚟，中字股就唞唞。其實資金都係輪流炒，市場未見新增資金，一注錢炒嚟炒去，繼續塘水滾塘魚。
雖然今日個市係威係勢大裂口高開，但中午前升幅削半，仲要喺開市價之下運行，升勢未必能維持，唔排除係借阿里消息挾高指數結算，一旦明日期結過後，再失二萬關及再度考驗20天及250天線，即19800水平，大市又有機會行返落去，港股仍然反覆，上上落落不過係大戶好淡鬥法，升市追貨十追九伏，胡亂追貨只會淪為大戶點心，倒不如隔岸觀火等結算。
麥狄文
(徐狄怡‧證監會持牌人)
