隔晚美股顯著下跌，主要係聯儲局主席鮑爺喺噚晚聽證會放鷹，話息口嘅高位可能唔止依家預估嘅頂部，因為要加大控制通脹力度，美債息跟美元走強，美股就咁就震散咗。隔晚夜期跟ADR已腳軟，不過仲死撐住10天線(20285)，但今朝港股一開市即低走向下，先失10天線後沽壓大增，跟住更一度失守20000大關。
恒指低開277點，開市即失10天線，盤中曾失守20000大關，跌554點，低見19979，其後跌幅略為收窄，目前於20000水平爭持。恒指半日收報20014，跌520點；國指跌200點，報6712；恒科指則跌155點，收3967，再失4000大關。半日成交額644.88億元，雖然唔算好大，但過千隻股票下跌，市況係明顯轉弱。
藍籌股只有三隻逆市上升，包括農夫山泉(09633)、聯通(00762)跟九倉置業(01997)，分別升1%、0.5%及0.1%。重磅指數股全數腳軟，ATMJB全線向下，阿里(09988)跟百度(09888)半日跌逾3%，騰訊(00700)跌2.5%，美團(03690)跟京東(09618)更跌近半成。大笨象(00005)跟友邦(01299)分別跌1%及2.5%，平保(02318)更跌4.4%，港交所(00388)跌少於2%，金融股中已經算強；其他內銀股噚日上半場威咗一陣，今日又打回原形，回復弱勢。
美元走強債息高企，生科股難免捱沽，龍頭藥明生物(02269)跌3.2%，同系藥明康德(02359)半日亦跌3.7%；其他生科股跌勢更厲害，跌少過5%嘅信達(01801)跟康方(09926)已經算係咁，其他生科股閒閒地跌半成或以上，石藥(01093)半日跌5.8%，藍籌之中表現最差。
阿Man已多次強調內房跟物管股，只會有波幅，冇升幅，加上人仔呢排走軟，兌美元又再逼近七算，內房物管股自然捱沽。整個板塊表現疲弱，跌幅超過5%比比皆是，呢個板塊都唔使指望太多，要博反彈都未輪到內房物管股。
早於兩會未開幕前，市場已憧憬國企改革，熱炒中字股，直至今日基建中字股仍能逆市上升，基建三寶中鐵(00390)、中鐵建(01186)跟中交建(01800)全線向上，分別逆市升2.5%、1.8%及4%，喺呢個市況之下，表現特別標青。
電視廣播(00511)自宣布要大搞直播帶貨後，股價節節上升，旗下上海翡翠東方傳播與淘寶的6小時直播帶貨首秀，帶來2350萬元人民幣銷售額，股價半日勁升逾五成。呢啲急升股，要參與炒作無話唔得，一定要嚴格執行止蝕，有唔對路第一時間跳車。不過泥漿摔角一向唔係阿Man杯茶，這些機會不是我的，都係乖乖做觀眾算數。
麥狄文
(徐狄怡‧證監會持牌人)
