隔晚美股顯著下跌，雖然早段高開，但因為有加密貨幣金融機構倒閉，市場擔心拖累到與其有來往嘅金融機構，甚至引發金融危機，銀行及保險股急挫，美股由升轉跌，收市三大指數跌逾1%，道指跌543點，標指跟納指分別跌73點及237點。反映中概股嘅金龍中國指數更跌逾5%，創四個月以嚟最大跌幅，港股呢度嘅中概股急挫，港股半日曾跌逾500點，失守250日線(約19884)。
恒指裂口低開344點，跌幅一度收窄至288點，見過半日低19637，其後沽壓再現，跌幅擴大至527點，見19398半日低位，相當接近1月3日低位19303，半日跌幅略為收窄。中午恒指報收19434，半日跌490點；國指半日跌164點，報收6485；恒科指半日跌142點，報收3788，呢兩個指數都創今年新低。跌市半日成交額增至767.77億元，沽壓唔細，加上周末前夕，唔想冒過周末風險，寧可清倉嘅大有人在。
藍籌股整體受壓，友邦(01299)今早去年公布少賺96%，半日挫4%，大笨象(00005)亦跌2.7%，主要係美國嘅加密貨幣銀行出咗事，金融股怕受連累，金融股全數走弱。早幾日保持強勢嘅中移動(00941)跟聯通(00762)半日分別跌2.8%及8.8%，連強勢股都頂唔住，大市失守250日線亦係自然不過嘅事。創科(00669)半日升0.8%，係表現最好藍籌股。
科網股表現疲弱，雖然京東(09618)好過預期，去年更扭虧為盈，但市場擔心其核心業務增長放緩，補貼開支大增，股價隔晚於美股已急挫，今日半日更跌11.8%，藍籌之中表現最差。至於百度(09888)嘅「文心一言」，有外媒指目前其個別基本功能仍未完成，百度半日亦挫逾半成。ATMJ其他三個成員，以騰訊(00700)跌少於2%最少，阿里(09988)跟美團(03690)則齊齊跌逾3%。其他科網股全線下挫，跌幅3%係最低收費。
Tesla已宣布個別型號減價，市場擔心新能源汽車市場爆發減價戰，汽車股捱沽，比亞迪(01211)半日跌近8%，電動車三傻蔚來(09866)、小鵬(09868)更理想汽車(02015)分別跌4.3%至6.9%不等。其他汽車股半日至少跌3%以上，表現疲弱。
大市跌穿250日線並非好現象，目前大市水平相當接近1月份低位，亦跟100日線19255僅一步之距，一旦連呢個位都失守，大市恐怕要下試18700水平，亦係由10月低位反彈至1月高位整個反彈浪升幅嘅回吐黃金比0.5。而大市失守250日線而未能於兩三日內收復，即較早前所講嘅由熊市步出牛市，亦只係假象，港股繼續熊市中運行，睇怕今年日子難過。
麥狄文
(徐狄怡‧證監會持牌人)
