隔晚美股靠穩，雖然美國公布嘅小非農數字，反映美國就業市場表現強勁，支持聯儲局繼續行緊縮貨幣政策，但市場反應唔算太大，似乎已漸消化今個月議息或加息0.5%嘅可能，美股變化唔大，道指跌少少，標指跟納指總算靠穩。至於內地今早宣布2月CPI創一年低位，工業生產者出廠價格指數PPI更連跌5個月，雖然數字反映內地經濟復甦速度唔夠快，但港股連跌兩日後，今早暫守20000關，好淡拉鋸，波幅收窄至不足200點。
恒指高開31點，一度跌穿20000，跌84點見19966半日低位。其後由跌轉升，最多升77點，見20129半日高位，但買盤唔多積極，半日成交額只有531.15億元，買賣兩閒。半日恒指收報20097，升45點；國指半日報6723，跌3點；恒科指半日微升1點，幾乎點穴。
藍籌股個別發展，ATMJ升跌參半，阿里(09988)半日升0.2%，京東(09618)升2%，美團(03690)跟騰訊(00700)則分別下跌0.8%及0.7%，不過沽壓唔算嚴重。鮑爺表示美國息口頂部或高於預期，金融股有資金追捧，友邦(01299)跟大笨象(00005)分別升0.8%及1.5%，為恒指貢獻24點升幅，加上中移動(00941)升1.4%，已經撐起大市。創科(00669)半日則升3.8%，為升幅最大藍籌股。
內地經濟數據反映經濟復甦速度唔多夠力水，餐飲股沽壓顯著，海底撈(06862)半日跌2.8%，同系特海國際(09658)跟頤海國際(01579)分別跌6.1%及3.7%；奈雪的茶(02150)跟九毛九(09922)分別跌5.1%及4.6%。
燃氣股亦因經濟復甦速度不如預期而走軟，新奧燃氣(02688)半日跌3.6%，藍籌之中表現最差；其他燃氣股全線走弱，華潤燃氣(01193)插5.3%，昆侖(00135)挫3.2%，中燃(00384)跌1.8%，港華(01083)跌0.7%已經算跌得少。
媒體股大幅波動，呢幾日因為直播帶貨大炒急升兩倍嘅電視廣播(00511)，早段一度再爆升逾三成，半日則倒跌3%。噚日跟炒，表明要加強直播營銷嘅香港科技探索(01137)半日曾升13.2%，但旗下HKTVmall上月訂單總額跌27%，半日倒跌6.6%。至於乘機跟炒嘅邵氏兄弟(00953)今日曾再升25%，但半日倒跌24%。不過，英皇文化產業(00491)半日仍勁升逾六成，橙天嘉禾(01132)半日升一成，提醒一句，炒呢啲股，就好似炒美股嘅迷因股一樣，迷一樣嘅炒作理由，參與炒作，有唔對路要識跳車，幾日急升幾倍，掉返轉頭一日急跌幾成亦有可能。
麥狄文
(徐狄怡‧證監會持牌人)
