上周五美股表現反覆，本來市場對美國貨幣傾向寛鬆嘅樂觀情緒略為退減，加上中美關係愈趨緊張，恒指今早一度失守21000。恒指低開280點，早段更跌390點，見20799半日低位。不過內地股市做好，港股跌幅收窄，跌幅曾收窄至65點，見半日高位21125。中午恒指報收21090，半日跌99點；國指半日跌8點，報收7117；恒科指半日跌22點，半報收4339。半日成交額606.42億元。
藍籌股只有少數上升，油價上升，中海油(00883)半日升1.6%；中移動(00941)半日升0.4%，兩者皆是防守性較高，兼且用作收息之用嘅股份，可見市場資金暫時較為保守。至於ATMJ半日只有美團(03690)靠穩，騰訊(00700)跟阿里(09988)則齊跌0.5%；京東(09618)則跌2%。不過近日因為ChatGPT概念熱炒嘅百度(09888)半日先低後高，雖然盤中曾低見135.2元，但半日倒升2.4%，重上140元水平之上。至於友邦(01299)、大笨象(00005)跟港交所(00388)等，都隨大市下跌。
領展(00823)上周五停牌公布折讓三成「五供一」，今早復牌裂口低開15%，盤中一度低見16.4%，報52.5元，見超過兩個月低位，半日跌幅收窄至12.5%，藍籌股中表現最差。市場憂慮其他地產股有樣學樣，向市場抽水，地產股普遍偏軟，新世界發展(00017)半日跌6.9%，至於九倉置業(01997)料去年由盈轉虧，半日跌2.5%，其他地產股跟產業信託股走軟，跌幅都超過2%。
據內媒統計，2023年31省份專項債和一般債提前批額度按年增長50%及32%，市場憧憬內地基建仍然係今年穩定經濟嘅重要方向，而資金快速到位也有望帶動兼建投資開復工提速，工程機械及基建股半日做好，當中以中聯重科(01157)半日升12.4%表現最好，其他重機股，中國重汽(03808)、龍工(03339)升8.1%；第一拖拉機升近4%。
除咗基建及重機股，內需股亦逆市走強，餐飲股跟消費股表現唔錯，海底撈(06862)半日升逾4%，呷哺呷哺(00520)更升6.3%；李寧(00291)半日升1.5%；華潤啤酒(00291)跟其他啤酒股都逆市向上。
另外今日有兩股因為本身消息急跌，新東方在綫(01797)執董兼CFO尹強上周四減持100萬股公司股份；拖累股份今早沽壓顯著，半日大跌近兩成。而內地進一步落實禁止跨境炒股，耀才決定喺釐清法規前，先暫時關閉內地身份開戶嘅客戶，股價半日亦跌12.3%。對於急跌股份，阿Man一向都係抱食花生態度去觀察，唔會貿然去接飛刀，今次自然亦唔例外，對於呢啲急跌股，都係眼看手勿動。
麥狄文
(徐狄怡‧證監會持牌人)
