美國聯儲局啱啱先轉咗口風，開始放鴿，轉個頭市場又擔心美國經濟明年可能陷入衰退，美股延續跌勢，尤其對息口較敏感嘅科網股，呢兩日跌勢比較急，隔晚美股三大指數下跌，納指跌幅更超過2%。不過港股都算保持強勢，半日好淡拉鋸，喺19500附近爭持。
恒指低開60點，早段最多跌108點，低見19332後回穩倒升，最多升158點，見19600，但呢個係由25000延伸至10月底部嘅下降軌頂部，19600受阻後，再度回落。最終半日恒指收19469，升28點；國指升15點，報6668；恒科指報4218，升57點。半日成交額只有903.01億元，嚟到19000水平樓上，買貨嘅投資者都會傾向保守啲。
藍籌股整體受壓，大笨象(00005)半日跌0.32%，友邦(01299)亦跌0.71%，其他金融股普遍偏軟，港交所(00388)半日維持1%升幅。內需股之中，李寧(02331)跟安踏(02020)半日分別升2.4%及1.6%，後者考慮安排Amer Sports招股上市。至於科網股，今日仲頂得到幾吓頭鎚，ATMJ個別發展，騰訊(00700)跟美團(03690)半日分別升0.4%及0.6%，阿里巴巴(09988)靠穩無升跌，京東(09618)半日則跌0.8%，港股半日撐得住，都係靠啲科網股。其他科網股表現更強，當中以商湯(00020)半日升16%最勁，而阿里健康(00241)半日升8.3%，藍籌之中表現最好。
除咗科網股，生科藥股今日亦見資金流入，康方(09926)癌症藥獲獨家許可交易額可達50億美元，半日急升逾兩成；其他生科股普遍向上，升幅閒閒地超過4%，只有藥明生物(02269)半日微升0.6%，咁嘅升幅係最水皮，不過之前都講咗，藥明生物喺過去兩年不斷配股，貨源配到散晒，已經難以回復過去嘅龍頭王者表現。
碧桂園(02007)唔夠一個月內兩次配股，股價半日插水一成，藍籌之中表現最差，其他內房股全線走軟，其他內房股跌2%至近8%不等。至於物管股亦走軟，但跌幅最多為半成，暫時較內房股強。
港股暫時仍維持強勢，市場靜待內地公布有關放寛防疫措施，不過急升過後，點都要唞唞氣，休息係為咗走更遠嘅路，最怕係急升急回，港股就好難走得更遠。
麥狄文
(徐狄怡‧證監會持牌人)
