雖然美股喺等待中期選舉結果之際，隔晚美股三大指數仍然向上，但今日內地公布10月PPI負增長，市場擔心內地通縮風險擴大，港股連續第二日下跌，半日跌逾250點收市，不過半日成交額縮水到629.13億元，其實以底部反彈逾二千點計，呢個調整嘅成交額，反映沽壓唔算太大。
恒指低開4點後，一度升172點，見16730半日高位，但內地公布PPI之後就急轉直下，跌幅更曾擴大至287點，見16270半日低位。中午恒指收報16305，跌251點；國指跌78點，收5523；恒科指報3279，半日跌65點。
藍籌股普遍向下，友邦(01299)跌2%，始終70元由之前支持位變阻力，暫時未夠力收復呢個位。大笨象(00005)半日跌0.7%；港交所(00388)由升轉跌，半日跌1.6%。其他藍籌股普遍下跌，但跌幅尚算溫和，係科網股沽壓較大，ATMJ全部要跌，騰訊(00700)跌3.7%，阿里巴巴(09988)跌2.2%，京東(09618)半日跌3.3%，美團(03690)跟百度(09888)齊齊跌4.2%，快手(01024)跌1.1%，嗶哩嗶哩(09626)插5.9%。
汽車股表現疲弱，美國Tesla遭大股東減持，影響汽車股投資氣氛，比亞迪(01211)宣布推出高端品牌，但半日股價跌5.7%；理想汽車(02015)跟零跑(09863)跌少於1%，其他車股跌逾2%。
內房跟物管股今日顯著反彈，中國擴大民企債券融資支持工具，規模料達2500億元人民幣，內房物管股炒起，其中碧桂園(02007)半日勁升17.4%，亦係升幅最大藍籌股；其他內房股升幅由3%起跳，至勁係最近無法支付債息嘅旭輝(00884)，半日勁彈33.9%。其實碧桂園係三隻示範內房民企中，暫時未出現過任何違約或未能支付債息嘅內房，大摩最近一份報告表示，碧桂園係最有條件反彈嘅內房股，不過始終上面蟹貨一大堆，加上內房整條產業鏈出事後，問題尚待解決，呢2500億元人民幣，能否救得返整個內房產業成疑，暫時都唔建議追入呢個板塊。
港股喺底部回升逾2000點後，呢兩日嘅調整可以接受，暫時恒指仍守20天線之上，心理關口16000亦守住，暫時只視為反彈浪中嘅調整，大方向反彈浪未完，尤其恒指能守16200密集區底部，同埋20天線，留意呢兩個位雙失就要小心反彈浪玩完。
麥狄文
(徐狄怡‧證監會持牌人)
