熱門:

2022年10月26日 港股直擊 即巿股評

【盤房來料】港股萬五見支持 好友力撐成交增

隔晩美股繼續借業績拉升,三大指數做好,道指跟標指升逾1%,納指追落後更升逾2%。值得留意標指已從低位反彈一成,而道指亦進入超買區,小心美股開始反覆。不過喺業績期未完結前,美股仍可借助業績反彈。阿爺表態,人行表示將加強各部門合作,維護股市、債市及樓市健康發展,呢個「一行兩會一局」發聲,帶動港股低位回升,低開高走。港股喺五個交易日急跌1749點,跌逾一成後,今日終於識得反彈,半日曾倒升400點。

恒指低開69點,最多跌124點,見15041半日低位,不過萬五關有支持,睇返呢兩日落到萬五水平,雖然仍然下跌,但成交連續兩日超過1200億元,反映已有資金肯喺呢個水平接貨,好友開始喺萬五水平跟淡友抗衡。加上內地股市表現唔錯,上證指數重返3000關,港股由跌轉升,半日最多升418點,見15584半日高位。中午恒指報收15495,升329點;國指半日收報5278,升98點;恒科指喺3000關口徘徊,半日升115點,報收2999,盤中曾重越3000關,見3023半日高位。半日成交額744億元,今日成交額應該可以保持1200億之上。

中概股喺周一周二美國時段跌到一仆一碌,隔晚終見反彈,雖然隔晚ADR跟夜期未見有太大反應,至今早先嚟起動,重磅科網股推高個市。單係ATMJ已為恒指貢獻逾百點,佔大市超過三成升幅。騰訊(00700)半日升4.4%;美團(03690)半日升近6.9%;京東(09618)升1.2%;阿里巴巴(09988)最削,半日僅升0.8%,股價失守70元後,阿里弱上加弱,睇嚟70元會成為短期較大阻力。其他科網股至少都升1%以上,阿里健康(00241)發盈喜,中期業績虧轉盈,半日升近一成,成為表現最好藍籌股。其他藍籌股普遍向好,大笨象(00005)升1.4%,總算守返40元個位,友邦(01299)半日升3.2%,而港交所(00388)喺呢兩日成交回升下有反彈,半日反彈5.5%。

生科股今日亦見有資金追捧,上海啟動接納用新冠疫苗,康希諾(06185)炒高20.6%;騰盛博藥(02137)抽升14.4%;歌禮(01672)炒高7.2%;開拓(09939)抽高6.9%;藥明生物(02269)反彈6.6%;藥明康德(02359)飆6.9%;信達(01801)亦升7.4%。整個板塊半日錄得半成以上升幅,似乎生科股殺估值已完成。

港股係咪真正見底,阿Man唔敢講,但暫時萬五水平已見支持,但呢個反彈可以維持幾耐,暫時仲係未知數,但港股弱底係事實,大市至少要上返16000至16500企穩,先有條件講轉勢。不過呢兩日成交保持喺1200億樓上係好事,總好過成交淡靜陰乾。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads