雖然鮑爺隔晚再放鷹，講到明要大大力加息以遏止通脹，不過市場都好似消化咗隻鷹，美股連續第二日反彈。港股跌咗足足六日，恒指累計跌咗近千點後，今日卒之有個似樣啲嘅反彈，半日急彈近五百點，成功收復萬九心理關口。
恒指今早高開39點，內地全國居民消費價格指數(CPI)及工業生產者出廠價格指數(PPI)比預期低，市場憧憬阿爺有機再放水，推動內地股市跟港股齊齊反彈。半日恒指一度升491點，見19345半日高位，高開高走。恒指半日升488點，報19342點；國指跟恒科指半日分別升2.9%及2.8%，半日成交額513.87億元，講真咁嘅成交額，係完全配合唔到個升幅，除咗挾淡倉，根本就唔係乜嘢轉勢升市。
藍籌股全面做好，連死死下嘅內房同物管股都有返啲起色，鄭州要求30天內爛尾樓全復工，若然有效或推行至其他城市，可以提振購房者信心，不過未有結果內房物管股就炒定先。此外，內地地方城市為樓市去庫存推出新政，據不完全統計今年以來內地超24個城市推出使用公積金「一人買房全家幫」房策，亦推動呢兩個板塊向上。碧桂園(02007)半日升近一成半，成為表現最佳藍籌股，仔仔碧服(06098)半日亦近一成。其他內房同物管股，閒閒地升半成以上。
科網股今日亦反彈，美團(03690)升半成，阿里(09988)彈逾3%，騰訊(00700)跟京東(09618)分別升逾1%及3%。不過除咗京東之外，ATM三隻指數重磅股，都仍然係大股東沽貨目標，南非股東要沽騰訊，日本仔軟庫等住沽阿里，而騰訊較早前傳出要沽旗下投資項目套現千億元，美團自然成為沽貨對象。講真，今日挾淡倉正正係趁反彈減持呢幾隻大股東要吼位沽貨嘅重磅股嘅好機會，一日大股東大把貨喺手等沽，呢幾隻股份都只會有波幅，冇升幅。
內地公布種植牙醫療服務政策，有分析指種植牙價格減價幅度細過預期，相關牙科股乘機落鑊，只不過呢啲股份急升只係啱睇唔啱炒，成交疏落，大上大落，一個唔小心追入好易又被套死。
港股長周末假期前挾淡友，擺明唔畀淡友舒服過周末，但今晚同周一晚美股走勢，或阻礙港股進一步反彈，美股有乜冬瓜豆腐，隨時周二港股返嚟又玩裂口，總之依家喺成交薄弱下，升升跌跌係大戶說了算，坐倉過夜風險回報唔成正比，都係坐埋一邊食花生算數，祝大家大個愉快中秋節。
麥狄文
(徐狄怡‧證監會持牌人)
