熱門:

2022年8月9日 港股直擊 即巿股評

【盤房來料】借免除內地買家雙重印花稅消息炒作勿太認真

隔晚美股個別發展,三大指數都已升抵阻力位,有回吐亦好正常,雖然唔少企業業績唔算理想,甚至調低嚟緊一季甚至全年盈利預測,但市場一於少理,美股喺樂觀情緒籠罩下,易升難跌。值得留意係,第一線股份升勢已放緩,甚至開始停步或掉頭,資金開始轉炒次一線股,甚至股仔,AMC跟GME呢個幾星期升咗超過五成,而新股HKD及MEGL亦暴升暴跌,雞犬皆升,美股有少少炒到尾水嘅感覺,呢啲時候要提高警覺。

至於港股今日表現反覆,早段一度挫逾200點,見19856半低位,不過A股回升,港股止跌回升,更因為有消息傳出考慮免除內地買家雙重印花稅,地產股抽高帶動下,恒指曾升逾200點,見20250日高位。中午恒指升182點,報20228;國指升64點,收6886;恒科指升23點,報4359。半日成交額500.39億元,升市之下未見成交回升配合,其實港股仍然偏靜。

藍籌股普遍造好,大笨象(00005)半日微升0.4%,友邦(01299)升1.3%。中移動(00941)升1.5%,更創月內高位51.7元,半日接近高位收,報51.65元;另一中資電訊股聯通(00762)中期多賺兩成,半日升3.7%。碧服(06098)半日彈近7%,係升幅最大藍籌,總算止咗近日跌勢,但碧桂園(02007)只係彈咗1.5%,表現麻麻。至於重磅科技股個別發展,京東(09618)跟美團(03690)分別跌1.7%及0.16%;不過騰訊(00700)跟阿里(09988)半日則升1.4%及2.4%。成交日日縮水,港交所(00388)半日跌0.1%。

半日表現最突出係本地地產股,據《彭博》報道,行政會議召集人葉劉淑儀表示,考慮免除內地買家雙重印花稅,全部本地地產股上升。不過咁,呢個消息只係葉劉嘅講法,並唔係政府嘅講法,亦只係一個建議,但有咁嘅消息都算係好事,總算令港股有返啲生氣。只不過就算消息落實,實際對地產股又係咪咁利好,阿Man有啲保留,內地樓市死死吓,內地買家有錢都畀阿爺話惡意不買房,曲線叫內地資金支持內地樓市,內地買家嘅錢,幾時先落得嚟香港買樓,所以都係純為炒作,大家千祈唔好太認真。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads