噚日恒指再跌，甫開市已失24000點，睇住個牛熊證街貨圖見牛證咁重重貨，唔向下再殺都真係有鬼。今日未開市前如常同聊天室嘅戰友睇個街貨圖，牛證真係愈儲愈肥，身形已經肥過我家肥貓，以最近嗰十層牛證街貨中，有四層儲到成過千張期指街貨喺度，若然個市一下子再向下殺落去，分分鐘12月成個中環放旺假都似。
終於嚟到恒指完U嘅時間，開市跌69點，報23782點，喺街貨圖上暫時仲未完全殺死任何一層牛證，不過喺五分鐘圖上見Slow STC(14,3)兩線於中軸水平並開始向下，本以為指數毫不客氣會向下面堆肥牛開句「 いただきます」(itadakimasu)跟手就起筷，恒指喺正式開市之後有一下chok返高上去，仲見倒升添，所以都好快咁同聊天室嘅戰友講等多一陣先，不過，依家9點39分，恒指再次掉頭向下，依家跌幅稍為擴大至117點，做緊23734點；哦，係咪食飯前要洗手先咋？
再開返個五分鐘圖睇，依家9點50分，指數沿住五分鐘圖上嘅保歷加通道底線向下落，但同時同50分鐘線又好鬼近，還好今朝聊天室第一注淡倉講明係爬格仔用，只不過今日可能爬得比較慢，唔緊要，方向啱就可以。
睇得呢個專欄耐嘅都知我比較大部份時間都係啄住條恒指做trade，老實講，睇一條指數做trade而成事嘅話，我諗你都唔想諗咁多嘢啦，重點係我對個股有某程度嘅黑氣；但有時事與願遺，一來恒指唔會日日聽話，二來有好多時都會被人問到有關個股嘅問題，就好似噚晚嘅電台節目一樣，還好揀咗隻小米(01810)(連主持都諗咗一諗)，今日逆市都有啲計。
點解揀小米？好簡單因為日線圖上見小米19.02元/19.04元呢個位喺近呢幾日都有支持，慢慢地形成一個底出嚟，再加上Slow STC(14,3)咁鬼殘，今日小米小彈，反映四底支持有力，再等嘅就係條Slow STC(14,3)出觸底反彈就可以。
小米Call(11850)，行使價20.5元，同現價有逾5.7%價外，低引伸，高槓桿，袋定喺袋，以日線圖見Slow STC(14,3)出到觸底反彈可以小離落場。
依家10點2分，恒指終於向下再插，23700點都穿咗，向23600至236699點過千張期指牛證街貨出發，聊天室一齊出咗淡倉嘅，或者你手上都已經有淡倉嘅，一齊講句「 いただきます」！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
即市聊天室/Patreon：https://www.patreon.com/cbbcwar
FB：https://www.facebook.com/cbbcwar
